اسلام آباد۔ 14مئی (اے پی پی) وزیر مملکت اطلاعات و نشریات و قومی میرات مریم اورنگزیب پارینے کہ لمہ نا رشتہ ٹی کائنات نا زیبائی نا مچ آ رنگ آک ڈکھوک ئُ ، لمہ ہمو ہستی ئِ ہرانا عظمت ئِ بیان کننگ کن لوز آتا ذخیرہ ساڑی اف۔ یک شنبے نا دے لمہ غاتا جہانی دے انا وخت آ تینا خصوصی کلہو اٹی اوپارے کہ لمہ نا رشتہ قربانی، ایثار و مابت آتا مجموعہ ئِ۔ اوپارے کہ لمہ نا رشتہ ٹی کائنات نا زیبائی نا مچ آ رنگ آک ڈکھوک ئُ و لمہ رحمت ہی رحمت ئِ۔ وزیر مملکت پارے کہ لمہ تون مابت و اونا قرب ہی لافانی زند اٹی اللہ و اونا رسول مقدس نا خوشنودی نا ذریعہ ئِ، جنت لمہ نا نت تا کیرغ آن ئِ و دانا طلب و دوئی ہر مسلمان نا خواہش اول ئِ۔ اوپارے کہ اسٹ لمہ نے ہر فریشانی و مصیبت آن بچفنگ نا وسیلہ تو ایلو دھرتی لمہ ہرا دا فانی زند اٹی نا وقار و پت انا نشانی ئِ۔ مریم اورنگزیب پارے کہ ودی کروک آ لمہ مرے یا آجوئی اٹ زند ئِ تدیفنگ نا حق تروک آ دھرتی لمہ مرے ، لمہ تون ہمیشہ مابت کننگے۔
