اسلام آباد۔ 29 دسمبر (اے پی پی) وزیراعظم محمد شہباز شریف نا کماشی ٹی ساڑی آ بنجائی حکومت اقتدار ءِ سنبھالنگ آن پد کشمیر نا ویل ءِ گچین وڑاٹ تالان کننگ کن فعال کڑد ادا کرے و بھارت نا غیر کانودی کوزہ ٹی جموں و کشمیر اٹی بھارتی کوزہ گیر فوج انا دوتے اٹ ریاستی دہشت گردی و انسانی حق انا خلاف ورزی تا ودوک آ واقعہ غاتے ہم جہانی و علاقائی فورم تیا ہرفینے وخت اس کہ جہانی برادری آ زور شاغنگانے کہ او متکن آ کشمیر نا ویل انا ایسری کن تینا پبی کڑد ءِ ادا کے۔ سفارتی مبصرآتا رداٹ ساڑی حکومت اینخو سال اپریل اٹی برسراقتدار بننگ آن پد خاص وڑاٹ وزیراعظم محمد شہباز شریف و وزیر خارجہ بلاول بھٹو زرداری جہانی و علاقائی پلیٹ فارم آتون اوار اوار تینا درملکی دورہ غاتیٹی کشمیر نا ویل و کشمیری تا حق خودارادیت ءِ دوٹوک وڑاٹ ہرفینو۔ وزیراعظم محمد شہباز شریف اقوام متحدہ نا جنرل اسمبلی نا سالانہ دیوان اٹی کشمیر نا ویل انا خاص وڑاٹ واشگاف لوزآتیٹی ذکر ءِ کرے۔ محمد شہباز شریف وزارت عظمیٰ نا منصب ءِ سنبھالنگ آن پد داسال اپریل نا ایسر اٹ شاہ سلمان بن عبدالعزیز و ولی عہد شہزادہ محمد بن سلمان نا سلہ غا سعودی عرب نا مسہ دے ئی دورہ ءِ کرے۔ دااولیکو درملکی دورہ ٹی وزیرخارجہ بلاول بھٹو زرداری ہم وزیراعظم تون اوار ئسک۔ وزیراعظم شہباز شریف متحدہ عرب امارات نا ہم دورہ ءِ کرے و یواے ای نا سرکڑدہ غاتون ہڑتوم آ کنڈآتا کمکاری تون اوار تین پہ تینی است خواہی نا علاقائی و جہانی امور آ گپ وتران کرے۔ وزیراعظم محمد شہباز شریف چین و قطر اتون اوار چندی ایلو سنگت ملک آتا ہم دورہ ءِ کرے۔ وزیراعظم محمد شہباز شریف پاکستان اٹی است ہسون نوکاپ آن مروک آ بھسکاری تیان دنیا ءِمعلومدار کننگ کن نومبر اٹی مصر انا دورہ ءِ کرے ہراڑے او شرم الشیخ کلائمیٹ امپلی منٹیشن سمٹ COP27اٹی بشخ ہلک۔ وزیرخارجہ بلاول بھٹو زرداری امریکہ، چین و جرمنی نا وزیر خارجہ غاتیان بیدس ایران، انڈونیشیا ، سنگاپور و ایلو ملک آتا ہم منصب آتون مروک آ اوڑدہی، چندی ملک آتا دورہ و اقوام متحدہ ، او آئی سی تون اوار جہانی فورم تیا کشمیر نا ویل ءِ پبی وڑاٹ تالان کرے و بھارت نا غیرکانودی کوزہ ٹی جموں وکشمیر اٹی بھارت نا ریاستی دہشت گردی نا کنڈآ چکار کرفے و اوفتے احساس ترفے کہ کشمیر اسہ ہندن ءُ متکن ءُ جھیڑہ اسے ہرا نئے بیرہ ڈیہہ بلکن امن کن ہم خطرہ اس جوڑ مننگ کیک۔ وزیرخارجہ کشمیر نا ویل انا سنگینی اتون اوار اوار بھارت اٹی برسراقتدار مودی حکومت نا ہندو توا نظریہ ءِ ہم بے نقاب کرے۔ بلاول بھٹو زرداری اقوام متحدہ نا جنرل اسمبلی نا 77 می دیوان نا وخت آ نیویارک اٹی اقوام متحدہ نا ہیڈکوارٹر اٹی او آئ سی نا وزراء خارجہ نا سالانہ رابطہ دیوان نا کماشی ءِ کرے و خت اس کہ اسلامی کمکار تنظیم نا باسک ملک آک مسلم امہ نا فائدہ غاتا فعال و پبی وکالت و او آئی سی ٹی نمان کڑد آ پاکستان نا ستاءِ کریر۔ او آئی سی نا باسک ملک آک سالانہ رابطہ دیوان اٹی جموں وکشمیر نا الس تون بدل مفروک یکجہتی ءِ ہم پوسکن کریر و اقوام متحدہ نا سلامتی کونسل و او آئی سی نا تعلقدار قرارداد و کشمیری الس نا است خواہی تا رداٹ اوفتا ناقابل تنسیخ حق خودارادیت نا پورو مخ تفی نا درشانی ءِ کریر۔ پاکستان اسلامی کمکارتنظیم نا بانی باسک نا وڑاٹ دا تنظیم ءِ مسلم المہ نا اسٹ انگا و غٹ آن نمان توار نا وڑاٹ بھاز اہمیت ایتک۔ اوامت مسلمہ ءِ مون تروک ویل آتے پبی وڑاٹ تالان کرے، ہرافتے ٹی ودوک آ اسلاموفوبیا ، فلسطین نا حالیت، بھارت نا غیرکانودی کوزہ ٹی جموں وکشمیر و چاگڑدی بدلی آن ودی مروک آ خطرہ ہم اوار ءِ۔ وزیرخارجہ امریکہ نا ساڑی آ دورہ ٹی میڈیا تون گپ وتران اٹی بھارتی وزیراعظم نریندر مودی ءِ ’’گجرات نا قصاب‘‘ گوندا و پارے کہ بھارت نا حکمران جماعت بی جے پی ہٹلر آن زہمی ءِ۔ پاکستان ساڑی ہی ٹی بھارت آن دہلی نا تہاڑ زندان اٹی بند کل جماعتی حریت کانفرنس نا راہشون الطاف احمد شاہ نا غیر انسانی حراستی مرک انا دمدستی جاست وپاست و اوٹی اوار غٹ زموار آتا محاسبہ ءِ کننگ نا ہم خواست کرے۔ حکومت کشمیری راہشون محمد یاسین ملک ءِ بنفوک آ عمر قید انا سزا نا باندات آ ہم اسلام آباد اٹی بھارت نا ناظم الامور ءِ وزارت خارجہ ٹی بٹنگسا پاکستان نا برانز آن معلومدار کننگا۔ پاکستان بھارت آن دوٹوک خواست اٹی ہم پارے کہ او تینا غیرکانودی کوزہ ٹی جموں وکشمیر اٹی 5 اگست 2019 آن پد کروک آ غٹ اسہ کنڈی و غیرکانودی گام گیج آتے کالعدم کے ہرافتا مسخت جموں و کشمیر نا جہانی کہول آ امنا مروک جھیڑہ ئی حیثیت ءِ نسخان تننگ نا ءِ۔ اقوام متحدہ نا سیکرٹری جنرل انتونیوگوتریس دا سال ستمبر اٹی پاکستان نا دورہ ءِ کرے، دادورہ ٹی پاکستان ءِ کشمیر نا ویل ءِ تالان کننگ نا موقع فراوان مس۔ وزیر خارجہ بلاول بھٹو زرداری 6 و7 اکتوبر آ جرمنی نا سرکاری دورہ ءِ کرے، جرمن ہم منصب تون ڈل آتا کہول آ مروک آ گپ وتران و پریس حوال اٹی ہڑتوم آ کنڈآتا کمکاری تون اوار اوار جموں وکشمیر تون اوار علاقائی و جہانی ویل آتا غٹ ویل آتیا گپ وتران کرے۔ پاکستان نا سفارت خانہ وہائی کمیشن آک 27 اکتوبر آمچ آ دنیا ٹی کشمیر نا تہار دے اڈتسر ہراٹی بھارتی غیرکانودی کوزہ ٹی جموں وکشمیر اٹی بھارت نا کنڈآن کروک آ انسانی حق انا خلاف ورزی تا مذمت ءِ کننگا و مظلوم کشمیری تا مخ تفی ءِ برجاتخنگ نا عزم انا درشانی ءِ کرے۔ داوخت آ وزیر خارجہ اقوام متحدہ نا جنرل اسمبلی ناصدر ، سلامتی کونسل ناصدر ، اقوام متحدہ نا سیکرٹری جنرل، ہائی کمشنر انسانی حق و او آئی سی نا سیکرٹری جنرل ءِ چٹھی مون تسنے تانکہ اوفتے مقبوضہ کشمیر نا سنگین حالیت آتیان معلومدار کننگ مرے۔ کشمیر نا تہاردے 27 اکتوبر1974 آ سری نگر اٹی بھارت فوج انا زوراکی اٹ پترینگ انگ نا یات اٹی اڈتننگک۔ پاکستانی سفیر آک دا دود آتیٹی پاکستان نا صدر ، وزیراعظم و وزیرخارجہ نا کلہو آتے خوانسا بنفیر۔ مقبوضہ کشمیر آ بھارت نا غیرکانودی کوزہ نا برخلاف تہاردے انا وخت آ اسلام آباد اٹی دفترخارجہ ٹی کشمیری الس تون یکجہتی نا درشانی کن اسہ دود اس اڈ ہلک، وخت اس کہ اسہ ریلی اس ہم کشنگا ہراٹی وزیر مملکت امور خارجہ حناربانی کھر، وزارت خارجہ نا آفیسر و عملہ نا باسک آک بشخ ہلکر۔ صدر مملکت، وزیراعظم و وزیر خارجہ داوخت آ تینا خصوصی کلہو آتیٹی پاکستان نا اصولی موعقف و کشمیر ی تا مخ تفی نا عزم انا درشانی ءِ کرے و جہانی برادری آ زور شاغا کہ او کشمیر نا ویل انا ایسری کن بھارت آ تینا پبی اثرورسوخ ءِ کاریم اٹ اتے، مقبوضہ کشمیر اٹی انسانی حق انا بھلو کچ اسے آ خلاف ورزی تے بند کننگے و کشمیر ی تا برخلاف جابرانہ گام گیج آتا چرجوئی ءِ توننگے۔ ستمبر اٹی وزیراعظم محمد شہباز شریف و وزیرخارجہ بلاول بھٹو زرداری اقوام متحدہ نا دیوان و چندی جہانی راہشون تتون اوڑدہی ٹیٹی کشمیر اٹی بھارت نا ریاستی دہشت گردی ءِ بے نقاب کریر و کشمیری تا حق خودارادیت نا پبی وڑاٹ وکالت ءِ کریر۔ ہندا تُو انا اول اٹی اسلامی کمکار تنظیم (او آئی سی ) نا سیکرٹری جنرل حسین ابراہیم طحہٰ پاکستان و آزاد جموں و کشمیر نا دورہ ءِ کرے۔ مظفرآباد و لائن آف کنٹرول نا دورہ نا وخت آ اودے بھارت نا غیرکانودی کوزہ ٹی جموں وکشمیر نا حالیت آتا بارواٹی حوال تننگا۔ اوپارے کہ کشمیری تا جہد اخلاقی و کانودی نقطہ نظر اٹ روا ءِ، او آئی سی نا سیکرٹری جنرل پارے کہ ویل اقوام متحدہ نا قراردادآتا رداٹ بایدے ایسر مرے۔ اومیت کننگک کہ پاکستان کشمیر نا ویل انا ایسری و اودے تالان کننگ کن ہرا گام گیج آتے کننگ ءِ اونا مثبت اثر زوت مون آ بریک، پاکستان نادا اصولی و پکا موقف ءِ کہ او ہر جہانی فورم آ کشمیر نا ویل ءِ تالان کیک و کشمیری تے اخلاقی ، سیاسی و سفارتی کہول آ مخ تفی ءِ برجاتخک۔
