اسلام آباد۔ 29 دسمبر (اے پی پی) وزیراعظم محمد شہباز شریف تینا قول ءِ پورو کننگ نا عزم انا درشانی ءِ کرسا پارینے کہ ای بطور خادمِ پاکستان آخیریکو نوکاپ زہمی بندغ نا بحالی اسکان آسرات تولپرہ، بروک آ تُو جنیوا ٹی نوکاپ زہمی تا توار ءِ اسہ وار ولدا آن مچ آ دنیا اسکان پبی وڑاٹ سر کینہ۔ پنچ شنبے نادے آ وزیراعظم آفس نا میڈیا ونگ انا کنڈآن جاری بیان نارداٹ وزیراعظم شہباز شریف نا کماشی ٹی بروک آ تُو جنیوا ٹی اڈ ہلوک ’’ریزیلیئنٹ پاکستان‘‘ کانفرنس نا بابت جاچ دیوان اس مس ہراٹی بنجائی وزیر اسحاق ڈار، سردار ایاز صادق، احسن اقبال، شیری رحمان، مریم اورنگزیب ، وزیر مملکت خارجہ امور حنا ربانی کھر، خصوصی کمکار سید طارق فاطمی، جہانزیب خان ، سید فہد حسین و تعلقدار بڑزکو کمامدارآک بشخ ہلکر۔ دیوان ءِ جنیوا ٹی اڈ ہلوک آ کانفرنس نا بابت سلاہ و سرجم لائحہ عمل اسے نا مسودہ پیش کننگا۔ دیوان ءِ پاننگاکہ کانفرنس اٹی سنگت ملک آتون اوار اوار ڈویلپمنٹ پارٹنرز و جہانی مالیاتی ادارہ غاتا بشخ ہلنگ ہم گمانی ءِ۔ دیوان آن تران کرسا وزیراعظم محمد شہباز شریف پارے کہ پاکستان اٹی موسمیاتی بدلی نا سوب آن اینخو سال سد آ جونک زیان و ارب آڈالر نا نسخان مس، نوکاپ زہمی نا بحالی و بھسکار انفراسٹرکچر نا تفنگ پاکستان کون آ پدتموک آ ملک اکن اسہ بھلو چیلنج اسے۔ اوپارے کہ ای قول انا رداٹ بطور خادمِ پاکستان آخیریکو نوکاپ زہمی بندغ آتا بحالی اسکان آسرات تولپرہ، بروک آتُو جنیوا ٹی نوکاپ زہمی تا توار ءِ اسہ وار ولدا آن مچ آ دنیا اسکان پبی وڑاٹ سرکینہ۔ وزیراعظم کانفرنس نا لائحہ عمل ءِ اولیتی بنداو تیا گڈیکو دروشم اس تننگ نا پارت کرے۔
