سکھر۔ 28 دسمبر (اے پی پی) وزیراعظم نا سلاہکار امور کشمیر و گلگت بلتستان، پیپلزپارٹی نا راہشون قمر زمان کائرہ پارینے کہ ملک ڈیفالٹ نا کنڈاآخا بلکن گچینی نا کنڈا ہِننگ ءِ، سنگت ملک آک ننتون سلوک ءُ، بلاول بھٹو سعودیہ تون تعلقداری تے گچین کننگ ءِ، مشکل فیصلہ کرسا نن تینا سیاسی آخبت ءِرکھ کننگ کینہ۔ داخیال آتا درشانی ءِ او سکھر اٹی ہائی کورٹ بار انا وکیل آتیان تران کرسا کرے۔ قمر زمان کائرہ پارے کہ مشکل فیصلہ کرسا نن تینا سیاسی آخبت ءِ رکھ کننگ کینہ۔ توانائی نا تنکی ءِ ولے اوڑان زوت پیش تمنہ۔ شام انا وخت آتیٹی بجلی نا ڈیمانڈ ودک، بجلی نا ڈیمانڈ ودک تو ڈبل یونٹ نا وڑاٹ استعمال مریک، ننے پاور جنریشن اٹی ودکی کروئی ءِ۔ اوپارے کہ صوبائی حکومت نا زمواری ءِ کہ او مارکیٹ ءِ کنٹرول کے، بجلی نا بچت کن نن آ مارکیٹ آتے بند کروئی مریک۔ نن مارکیٹ آتے شام انا ہشت بجہ غا بند کننگ نا پانہ تو کننگ کن اِلیپسہ۔ قمر زمان کائرہ پارے کہ منشیات نا سمگلنگ ءِ توننگ کن سخت گام گیج کروئی مریک۔ اوپارے کہ نن ڈیفالٹ نا کنڈا آخا گچینی نا کنڈا ہِننگ اُن۔ ملک انا ڈیفالٹ نا فائدہ شاید جماعت اسے مرے ولے ملک و الس کن سہی اف، سنگت ملک آک ننتون سلوک ءُ۔ بلاول بھٹو زرداری سعودی عرب تون تعلقداری تے گچین کننگ ءِ، عمران خان آنبار سعودی ٹیکی تے بہاکپننگ اُن۔ نن عمران خان تون سلنگ خواہسن تو او ننے کرینگ تس۔ قمر زمان کائرہ پارے کہ دہشت گردی دُوارہ ملک اٹی کاٹم ہرفنگ ءِ، پاکستان پیپلزپارٹی مدام دہشت گردی نا مقابلہ ءِ کرینے و داسہ ہم مقابلہ ءِ کننگ ءِ۔
