پارلیمانی پارٹی تے دہشت گردی نا برخلاف اسیجائی لائحہ عمل اس اختیار کننگ کن پارلیمنٹ اٹی تینا سفارش آتے پیش کروئی مریک
اسلام آباد۔ 14مئی (اے پی پی) چیئرمین سینیٹ میاں رضا ربانی پارینے کہ غٹ پارلیمانی پارٹی تے دہشت گردی نا برخلاف اسیجائی لائحہ عمل اس اختیار کننگ کن پارلیمنٹ اٹی تینا سفارش آتے پیش کروئی مریک، ملک اٹی دہشت گرد و شدت پسندنظریہ غاتا برخلاف بیانیہ پیش کننگ اسہ مدرسہ سے نا دنگ اٹی ہم بفک بلکن غٹ تعلقدار بشخ، سیاسی جماعت و سیاسی سرکڑدہ غاتے دا چرجوئی ٹی اتفاق رائے ودی کروئی مریک، دابابت پارلیمنٹ نا کسر ئِ اختیار کروئی مریک، کشمیر اٹی بھارتی بربریت نا چٹفنگ و دا ویل نا ایسری اسکان بھارت تون تعلقداریک گچین مننگ کپسہ۔ داخیال آتا درشانی ئِ او کوئٹہ ٹی ڈپٹی چیئرمین سینیٹ مولانا عبدالغفور حیدری و مستونگ خود کش جلہو نا واقعہ ٹی ٹھپی مروک آ ایلو بندغ آتا جان پڑسی آن پد میڈیا تون ہیت وگپ کرسا کرے۔ اوپارے کہ ننے تینا خلقت نا بابت مثبت رویہ اختیار کروئی مریک و اوفتا ٹھپ آتیا مالم خلوئی مریک۔ میاں رضا ربانی پارے کہ مستین نا غلط پالیسی تا سوب ملک اٹی لسانی پھسات و فرقہ واریت اٹی ودکی مس ہرانا محرک پرویز مشرف و ایلو فتا غلط گام گیج آک ئسر۔ اوپارے کہ ملک دہشت گردی نا پلویڑ اٹی ئِ و داوخت دا دہشت گردی تینا بدانگا دروشم اٹی ننا مون آ بننگ ئِ۔ میاں رضا ربانی پارے کہ فوج و سیاسی سرکڑدہ غاتے دہشت گردی نا نظریہ و جنگ انا بابت یکجا مرسا کڑد ادا کروئی مریک و غٹ سیاسی جماعت آک دا چرجوئی ٹی پارلیمان نا کمک اٹ گام گیج تجویز کیر، اوپارے کہ آپریشن ردالفساد نا سرسہبی کن غٹ تعلقدار بشخ آتے اسہ پنہ غا بروئی مریک، اسہ ایلو آ دوبہ غاتیان بیدس قومی یکجہتی اٹ دہشت گردی نا برخلاف جنگ انا حکمت عملی اس وضع کروئی مریک۔ میاں رضا ربانی پارے کہ کشمیر اٹی ساڑی آبھارتی بربریت نا چٹفنگ و دا ویل انا ایسری اسکان بھارت تون تعلقداریک گچین مننگ کپسہ ولے ایران، اوغانستان و سارک انا ایلو ملک آتون مذاکرات نا درگہ غاتے ملوئی مریک تانکہ نئے بیرہ پاکستان بلکن ڈیہہ ٹی دیرینہ امن ممکن مرے۔
