اسلام آباد۔ 28 دسمبر (اے پی پی) بنجائی وزیر خزانہ و محصولات سینیٹر محمد اسحاق ڈار پارینے کہ پاکستان خواتہ مفک و داہیت انا ہچ ءُ گمان اس اف، خواتہ مننگ نا ہیت کروک آ پن انا دانشور آتے بے سہبی و مایوسی مریک، پاکستان ءِ مشکل آتا مین آن کشوئی ءِ، اقتصادی زون تیٹی پیش رفت مننگ ءِ ، کشت وکشار کن پیکج تننگا، حسابات جاریہ نا کھاتہ غاتا نسخان تے 8 درسد آن شیف اتنگ، پرائمری بیلنس ءِ سرپلس و اسٹاک ایکسچینج ءِ گچین کننگ ننا اولیت آتیٹی اوار ءِ۔ اوداخیال آتا درشانی ءِ چارشنبےنادے آ پاکستان اسٹاک ایکسچینج اٹی گونگ دود آن تینا ویڈیو تران اٹی کرے۔ وزیرخزانہ دود اٹی بشخ ہلنگ نا سلہ غا منتظمین آتا منت واری ءِ ہرفے وپارے کہ سٹاک و کیپٹل مارکیٹ نا شونداری ننا حکومت نا اولیت آتیٹی اوار ءِ۔ وزیرخارجہ پارے کہ بدبختی اٹ مسکوہی حکومت ایلو بشخ آتیانبار دا بشخ ءِ ہم گوجالا، سیکورٹی اینڈ ایکسچینج کمیشن تدوک آ اِرا سال آن بدبختی اٹ فعال اَلوکہ۔ ساڑی آ حکومت شفاف عمل نا کمک اٹ اودے پورو کرے، ایس ای سی پی نا کانود اٹی نن ترمیم کرین۔ وزیرخزانہ پارے کہ ملک اسے نا سمت ءِ سہی و مثبت کنڈا دننگ اٹ سٹاک ایکسچینج نا اہم ءُ کڑد اس مریک ، ننا تدوک آ حکومت کارپوریٹ بشخ اٹی اصلاحات کرے، کمپنی آرڈی ننس اٹی ترمیم کننگا دا اصلاحات آن اسٹاک ایکسچینج سویلی ایشیا نا گچینی اسٹاک مارکیٹ جوڑ مس، دا بشخ انا شونداری ننا حکومت نا اولیت آتیٹی اوار ءِ و اواری اٹ دا بشخ ءِ شونداری نا کنڈا دینہ۔ وزیرخزانہ پارے کہ کارپوریٹ بشخ انا خراج نا بابت باندات ایف بی آر نا مون آ تخنگک۔ اوپارے کہ پاکستان نا پوریاگر و صنعت کار کمیونٹی ملک اتون سلوک ءُ ہراتم پاکستان 2013 ٹی میکرو اکنامک نزوری نا گواچی ئس و دا ہیت ءِ پاننگاکہ کہ ہراکہ حکومت جوڑ مریک او 6 آن 8 تُو اٹی ڈیفالٹ مریک ولے پاکستان نا بزنس کمیونٹی حکومت تون تفے و مسہ سال انا وخت اٹی ننا زرگزرانی ٹک سہی مس، افراط زر نا کچ 4.6 درسد مس، خور انا افراط زر انا کچ 2 درسد ئسک، ننا اسٹاک ایکسچینج سویلی ایشیا نا گچین اسٹاک مارکیٹ جوڑ مس پاکستانی کرنسی دنیا نا گچین کرنسی تا رُمب اٹی اوار مس، براہ راست پیشن نا زرکاری ٹی خاطر خواہ ودکی مس، 100 ارب ڈالر نا مارکیٹ کیپٹلائزیشن مس۔ اوپارے کہ دا سوج ءِ اَریفنگے کہ تدوک آ چار سال اٹی 70 ارب ڈالر نامارکیٹ کیپٹلائزیشن انت اکن زہمی مس، نن ہرا گام گیج آتے کرین اونا رداٹ 2030 اٹی پاکستان دنیا نا 20 گچین زرگزران تیٹی چاہنگاکہ، نن سجفن کہ تدوک آ چار سال اٹی دُن ءُ انت اس مس کہ نن داسہ اسہ اسہ ڈالر کن بھاگ دوڑ کننگ اٹی اُن۔
