اسلام آباد۔ 28 دسمبر (اے پی پی) بنجائی سیکرٹری حوالکاری و شینکاری شاہیرہ شاہد پارینے کہ میڈیا ملک ءِ مون تروک چیلنج آتا بابت گچین و فعال کڑد ادا کرینے، پاکستان انفارمیشن سینٹر نا جوڑ کننگ نا مسخت مچ آ ملک انا صحافی تے پوسکن آ کسبی تربیت فراوان کننگ ءِ۔ داخیال آتا درشانی ءِ او چارشنبےنادے آ وزارت حوالکاری و شینکاری و پریس انفارمیشن ڈیپارٹمنٹ (پی آئی ڈی ) نا خصوصی گام، پاکستان انفارمیشن سینٹر زنا کنڈآن انفارمیشن سروس اکیڈمی ٹی ’’خبرآتا راستکی، جعلی خبر و ریاست مخالف پروپیگنڈا تا توننگ‘‘ نا سرحال آن اِرادے ئی ہیلکاری ورکشاپ نا بنائی دود آن تران کرسا کرے۔ اوپارے کہ چندی شار تیٹی پرنٹ، الیکٹرانک و سوشل میڈیا تون وابستہ صحافی تے صحافت اٹی پوسکن آ کچ و مون تروک چیلنج آتا بابت چندی سرحال آتیا تربیت فراوان کننگ انگ ءِ، پاکستان انفارمیشن سینٹر نا جوڑ کننگ نا مسخت مچ آ ملک انا صحافی تے پوسکن آ کسبی تربیت فراوان کننگ ءِ۔ اوپارے کہ دا ورکشاپ نا مسخت میڈیا نا نمائندہ غاتے ریاست نا فائدہ غاتا بارواٹی آگاہی و موقف فراوان کننگ ءِ انتئے کہ ساڑی آ دور اٹی خبرآتا صداقت و جعلی خبر آک بھلو چیلنج اسے ءُ۔ اوپارے کہ میڈیا ریاست نا چارمیکو تمبہ ءِ و دانا ملک ءِ مون تروک چیلنج آتا بابت آگاہی ودی کننگ اٹ اہم کڑد اسے۔ سیکرٹری حوالکاری پارے کہ مچ آ ملک اٹی اسلام آباد تون اوار 7 ہند آتیٹی صحافی تیکن پاکستان انفارمیشن سینٹر آتیٹی ہیلکاری ورکشاپ اڈتننگ انگ ءِ۔ داکان مست پاکستان انفارمیشن سینٹر آتا ڈائریکٹر محمد صغیر احمد پاکستان انفارمیشن سینٹر آتا کنڈآن برجا ورکشاپ و پی آئی سی نا کارکڑد نا بابت معلومدار کرے۔ اوپارے کہ تدوک آ سال پاکستان انفارمیشن سینٹر نا کنڈآن چندی سرحال آتیا مچ آ ملک اٹی 16 ہیلکاری ورکشاپ اڈتننگاسس ہرافتے ٹی 700 آن زیات صحافی تے تربیت فراوان کننگا۔ پاکستان انفارمیشن سینٹر نا کنڈآن ہندا تُو 7 شار تیٹی اہم سرحال آتیا ہیلکاری ورکشاپ اڈتننگ انگ ءِ۔
