اسلام آباد۔ 28 دسمبر (اے پی پی) بنجائی وزیر غذائی رکھ و پٹ وپول چوہدری طارق بشیر چیمہ پارینے کہ کشت وکشار ملکی شونداری ٹی تمبہ نا حیثیت تخک، وزیراعظم بزغر پیکج اٹی خاص است خواہی ہلسا اونا منظوری ءِ تسنے ہرادے او تینٹ مانیٹر کننگ اٹی ءِ، وزیراعظم کشاری وام تیٹی خاطرخواہ ودکی کرینے، بلوچستان و سندھ اٹی ساڑی آ نوکاپ نا سوب آن فصل آک بھس مسر۔ بنجائی وزیر طارق بشیر چیمہ چارشنبےنادے آ داڑے پریس کانفرنس کرسا پارے کہ ملک ءِ مشکل آتیان کشنگ کن بزغرآتا کڑد بھاز اہم ءِ، کشت وکشار ملکی شونداری ٹی تمبہ نا حیثیت تخک، ہیبدار پالیسی تا سوب آن اینوننے کشاری مصنوعات درآمد کروئی تمک۔ اوپارے کہ ملک انا 21 ملین ایکڑ رقبہ غا خولم نا دسنگ پورو مسنے ہراکہ کل دسوک رقبہ نا 91 درسد ءُ و دا است بڈ ہیت اسے کہ بزغرآک دا مشکل حالیت آتیٹی خولم نا کاشت کرینو، ایلو رقبہ غا ہم منہ دے اٹی خولم دسنگ پورو مریک وانشاء اللہ اومیت ءِ خولم پیشن نا ملک آتیان خواہوئی تمپک۔ اوپارے کہ ہرا بینک بزغر پیکج ءِ ڈیل کننگ ءِ اونا کارکڑد بھاز حد اسکان گچین ءِ، نوکاپ آن زہمی علاقہ غاتیٹی انت کہ وام اس تننگانے اوفتیا مارک اپ ءِ چٹفنگ انگ ءِ ، دا وام تا 50 درسد مارک اپ بنجائی حکومت و 50 درسد بینک سگک، دا چرجوئی ٹی اسٹیٹ بینک نوٹیفکیشن جاری کرینے و سرکلر ہم غٹ بینک آتے گدریفینے۔ اوپارے کہ نوکاپ آن زہمی علاقہ غاتیٹی ہراڑے خولم نا دسنگ ممکن ئس، ہموڑے دسنگانے وانشا ء اللہ داکان بمپر کراپ دوئی مریک۔ اوپارے کہ وزیراعظم کشاری وام تیٹی خاطر خواہ ودکی کرینے و نوکاپ زہمی علاقہ غاتیٹی وام تیا مارک اپ ءِ ختم کرینے۔ اوپارے کہ دا دا پیکج نا رداٹ ورناتے تروک آ وام تیٹی کشاری وام تے ہم اوار کننگانے مہالو داوڑ اسُل متنے، وزیراعظم 5 سال استعمال مروک آ ٹریکٹر درآمد کننگ نا موکل تسنے۔ اوپارے کہ ٹریکٹر صآتا سپیئر پارٹ آتیا ڈیوٹی 15 درسد کرینے ہراڑان متکن آ ٹریکٹر آتا سپیئر پارٹ باآسانی دوئی مریرہ۔ طارق بشیر چیمہ پارے کہ وزیراعظم ڈی اے پی کھد انا نہاد ءِ 2500 روپئی اسکان کم کرینے۔ اوپارے کہ بزغر پیکج نا رداٹ ڈی اے پی نا کھد انا نہاد اٹی کمتی کرسا 2500 روپئی فی بیگ نہاد اٹی کمتی کرینے و نہاد 13 ءُ نیم ہزارروپئی آن کم مرسا 11 ہزار مقرر کرینے وخت اس کہ ساڑی آ مارکیٹ اٹی ڈی اے پی نا گونی 9 ہزار روپئی اسکان بسنے و ڈی اے پی کھد لس مارکیٹ اٹی بھلو کچ اسے ٹی ساڑی ءِ۔
