اسلام آباد۔ 28 دسمبر (اے پی پی) صدر مملکت ڈاکٹر عارف علوی پارینے کہ مچ آ قوم دہشت گردی نا برخلاف جنگ اٹی یکجاءُ، شہید آتا ملک ءِ دہشت گردی آن پاک کننگ کن تروک آ قربانی تے یات تخنگک، شہید آتا قربانی تا سوب آن نن دہشت گردی آن پورو نجات دوئی کینہ۔ چارشنبےنادے آ ایوان صدر نا پریس ونگ آن جاری بیان نا رداٹ صدر مملکت ڈاکٹر عارف علوی 23 دسمبر آ آئی ٹین، اسلام آباد اٹی خودکش دھماکہ ٹی شہید مروک آ پولیس نا ہیڈ کانسٹیبل سید عدیل حسنین نا خاہوت تون ٹیل فون آگپ وتران کرے و شہید انا خاہوت ءِ حکومت نا کنڈآن ہرممکن کمکاری نا باوری کرفے۔ او25 دسمبر آ کوہلو ، بلوچستان اٹی دھماکہ ٹی شہید مروک آ پاک فوج انا ورناتا وارث آتون ہم ٹیل فون آ است ہسونی نا درشانی ءِ کرے۔ صدر مملکت کیپٹن محمد فہد خان و سپاہی اصغرالدین نا خاہوت تون فون آ گپ وتران کرے۔ اوسپاہی محمد شمعون و لانس نائیک محمد امتیاز نا وارث آتون ہم ہڑزخواہی کرے۔ صدر مملکت شہید آتے اوفتا نرزوری ، فرض شناسی و قوم اکن قربانی تیا خراج تحسین پیش کرے۔ صدر مملکت شہیدآتا خاہوت آتا وطن کن قربانی تا جوزہ غاتا ہم ستاءِ کرے۔ صدر مملکت غٹ شہید آتے وطن کن خذمت و جان نا قربانی پیش کننگ آ خراج عقیدت پیش کرے۔ صدر ملکت پارے کہ شہید آتا ملک ءِ دہشت گردی آن پاک کننگ کن تروک آ قربانی تے یات تخنگک، مچ آ قوم دہشت گردی نا برخلاف جنگ اٹی یکجا ءُ، شہید آتا قربانی تا سوب آن نن دہشت گرد ی آن پورو نجات دوئی کینہ۔ صدر مملکت خاہوت تون دلی ہمدردی نا درشانی ءِ کرے و صبر و جمیل نا ہم دعا کرے۔
