اسلام آباد۔ 28 دسمبر (اے پی پی) صدر مملکت ڈاکٹر عارف علوی بنجائی ہسپتال نا 37 ملازم آتے کورونا ہیلتھ رسک الاؤنسس تننگ نا پرمان ءِ پک کرسا رسک الاؤنس تننگ کن تازہ سمری ءِ پی ایم سیکرٹریٹ آ گدریفنگ نا پرمان ءِ برقرار تخانے۔ چارشنبےنادے آ ایوان صدر نا پریس ونگ انا رداٹ صدر مملکت بنجائی محتسب نا پرمان نا برخلاف وزارت قومی جان جوڑی خذمت آتا اپیل ءِ مسترد کرے۔ نیشنل انسٹی ٹیوٹ آف ری ہیبلی ٹیشن میڈیسن (نِرم) و فیڈرل گورنمنٹ سروسز ہسپتال نا 37 ملازم آتے نان کلینیکل گوندسا الاؤنس آن محروم کننگاسس، مقبول احمد و ایلو غاوتروک آک الاؤنس ملپننگ آ بنجائی محتسب ءِ غاو تسوسر۔ غاو تروک آتا موقف نا رداٹ او محکمہ غاتا سروک آتا پارت آ خطرہ غان پد ہم کورونا دین اٹی فرض سرترسا کریر، چندی ملازم آتے کورونا رسک الاؤنس تننگا وخت اس کہ اوفتے نان کلینیکل اسٹاف گوندسا امتیازی سلوک کننگا۔ غاو تروک آتا رداٹ کلینیکل و نان کلینیکل ملازم آک اسہ وڑ تینا ہسپتال آتیٹی ڈیوٹی سرترسا کریر۔ فیصلہ نا رداٹ اگست 2021 ٹی وزارت بنجائی سرکاری ہسپتال/ادارہ غاتا طبی عملہ ءِ کورونا ہیلتھ رسک الاؤنس تننگ کن فنڈ فراوان کرے، فیڈرل گورنمنٹ پولی کلینک پوسٹ گریجویٹ میڈیکل انسٹی ٹیوٹ اسلام آباد ہم فائدہ ہرفوک آتیان اسٹ ئسک، 2020 اٹی ملازم آتے کورونا رسک الاؤنس تننگا وخت اس کہ 2021ء ٹی 37 ملازم آتے نان کلینیکل گوندسا الاؤنس آن محروم کننگا۔ فیصلہ ٹی گوندنگاکہ کلینیکل و نان کلینیکل عملہ اسہ وڑ پرخطر چاگڑد اٹی کاریم کیرہ، ایگزیکٹیو ڈائریکٹر ایجنسی نا ایلو 37 ملازم آتے الاؤنس تننگ نا سفارش کرے۔ صدر مملکت وزارت جان جوڑی نا اپیل بدانتظامی پک مننگ آ مسترد کرینے۔
