اسلام آباد۔ 28 دسمبر (اے پی پی) وزیراعظم محمد شہباز شریف کشاری شونداری ءِ پاکستان اٹی فوڈ سیکورٹی نا ضمانت گوندسا پارینے کہ بزغر پیکج آ عملدرآمد ءِ ترند کننگے، دال و ایلو گڑاتا پیدوار ءِ ودفنگ کن گچین بج آتا فراوانی ءِ پک کننگے۔ چارشنبےنادے آ وزیراعظم آفس نا میڈیا ونگ انا کنڈآن جاری بیان نا رداٹ اوداپارت ءِ کشاری بشخ انا شونداری کن حکومت نا تروک آ تاریخی بزغر پیکج آ جاچ دیوان نا کماشی ءِ کرسا پارے۔ دیوان اٹی وزیر خزانہ اسحاق ڈار ، وزیر قومی غذائی رکھ و پٹ وپول چودھری طارق بشیر چیمہ ، وزیر داخلہ رانا ثناء اللہ خان، وزیر صنعت سید مرتضیٰ محمود، وزیر حوالکاری مریم اورنگزیب ، وزیر مملکت پیٹرولیم ڈاکٹر مصدق ملک، وزیراعظم نا خصوصی کمکار ڈاکٹر جہانزیب خان، گورنر اسٹیٹ بینک جمیل احمد، وزیراعظم نا کوآرڈنیٹر رانا احسان افضل و تعلقدار بڑزکو کمامدارآک بشخ ہلکر۔ وزیراعظم پارے کہ بزگر پیکج آ عملدرآمد ءِ ترند کننگے، کشاری بشخ انا شونداری پاکستان اٹی فوڈ سیکورٹی نا ضامن ءِ۔ اوپارے کہ ننے ہرحال اٹ پاکستان اٹی غذائی رکھ ءِ پک کننگ ءِ ، ملک اٹی غذائی رکھ اکن خولم، کرپاس، کنولہ و زیتون نا دسنگ و پیدوار آ خاص چکار کننگے و بزغرآتے دال آتون اوار ایلو غذائی گڑاتا پیدوار ءِ ودفنگ کن گچین بیج آتا فراوانی ءِ پک کننگے۔ دیوان ءِ پاننگاکہ بزغرپیکج آ عملدرآمد کن ورناتیکن وام اسکیم، چنکا بزغر آتیکن سود آ اِلنگ و نوکاپ آن زہمی علاقہ غاتیٹی چنکا بزغر آتے بے سود کشاری وام فراوان کننگ نا چرجوئی ٹی اسٹیٹ بینک نوٹیفکیشن نا کمک اٹ بینک آتے پارت جاری کرینے۔ ہندا مالی سال اٹی نومبر اسکان 664 ارب نا کشاری وام بزغرآتیٹی بشخنگانے ہرا تدوک آمالی سال انا ہند اوخت انا مقابلہ ٹی 36 درسد زیات ءُ۔
