اسلام آباد۔ 28 دسمبر (اے پی پی) بنجائی کابینہ چندی علاقہ غاتیٹی دہشت گردی نا واقعہ غاتا مذمت ءِ کرسا دا عزم انا درشانی ءِ کرینے کہ ملک اٹی امن و ایمنی نا حالیت آتیا ہچ ءُ سمجھوتہ اس کننگپک و دہشت گردی ءِ روتہ غاتیان چٹفنگک وخت اس کہ وزیراعظم محمد شہباز شریف ایندھن نا درآمدی بل اٹی کمتی کن توانائی بچت پلان آ عملدرآمد و گیگ بدل توانائی نا کاریم اٹ اتنگ ءِ المی گوندسا سرکاری دفتر آتیٹی بجلی نا کھپت ءِ 30 درسد کم کننگ کن کمیٹی اس جوڑ کرینے۔ بنجائی کابینہ نا دیوان وزیراعظم محمد شہباز شریف نا کماشی ٹی چارشنبے نادے آ داڑے وزیراعظم ہاؤس اٹی اڈ ہلک۔ بنجائی کابینہ حکومت پنجاب نا کنڈآن سینئر پارلیمنٹرین چوہدری اشرف ءِ 53 سال انا متکن آ کیس اٹی دزگیر کننگ آ است ہسونی نا درشانی ءِ کرسا دا واقعہ نا ترند انگا لوز آتیٹی مذمت ءِ کرے۔ بنجائی کابینہ ملک انا چندی علاقہ غاتیٹی مروک آ دہشت گردی نا واقعہ غاتیٹی شہید مروک آ بندغ آتیکن دعا پاتیا کرے و د ا واقعہ غاتا ترندی اٹ مذمت ءِ کرسا دا عزم انا درشانی ءِ کرے کہ ملک اٹی امن و ایمنی نا حالیت آتیا ہچ وڑنا سمجھوتہ کننگپک و دہشت گردی نا عفریت ءِ ماس آن چٹفنگک۔ بنجائی کابینہ دہشت گردی نا برخلاف پدریسہ جہد آ سیکورٹی فورس آتے خراج تحسین پیش کرے۔ بنجائی کابینہ پاور ڈویژن نا کنڈآن پیش کروک ’’مجوزہ توانائی بچت پلان‘‘ آ شرہ کرے۔ دیوان ءِ ہندا توانائی بچت پلان نا بابت سٹیک ہولڈر آتون مروک داتم اسکان کروک آ سلابت آ حوال تننگا۔ وزیراعظم پارے کہ صوبائی حکومت آک، آزاد جموں و کشمیر و گلگت بلتستان نا حکومت آتون اوار غٹ اسٹیک ہولڈر آتون سلابت نا عمل ءِ زوت آن زوت پورو کننگے تانکہ ’’مجوزہ توانائی بچت پلان ‘‘ نا نفاذ ءِ پک کننگے۔ وزیراعظم پارے کہ ننے بحیثیت قوم توانائی نا بابت کفایت شعاری ءِ تینا کننگ نا سخت گرج ءِ و داچرجوئی ٹی ننے تینا رویہ و وڑءِ بدل کننگ نا دمدستی گرج ءِ۔ وزیراعظم پارے کہ ایندھن نا مد اٹی درآمدی بل اٹی کمتی کن توانائی بچت پلان آ عملدرآمد و گیگ بدل توانائی نا کاریم اٹ اتنگ المی ءِ۔ وزیراعظم بنجائی وزیر توانائی ءِ پاکستان اٹی ونڈ پاور نا کچ انا بابت اسہ سرجم ءُ رپورٹ اس کابینہ دیوان اٹی پیش کننگ نا ہم پارت کرے۔ وزیراعظم سرکاری دفترآتیٹی بجلی نا کھپت ءِ 30 درسد کم کننگ نا بابت اسہ کمیٹی اس جوڑ کننگ نا ہم پارت کرے ہراٹی بنجائی وزیر توانائی، بنجائی وزیر ڈٹ بندی، وزیر مملکت پیٹرولیم و قدرتی وسیلہ و تعلقدار سیکرٹریک اوار مریرہ۔ دیوان ءِ پاننگاکہ وزارت حوالکاری و شینکاری و نیشنل انرجی ایفیشنسی اینڈ کنزرویشن اتھارٹی توانائی بچت و کفایت شعاری نا بارواٹی اسہ آگہی مہم اس ہم تیار کننگانے۔ بنجائی کابینہ وزارت صنعت و پیدوار نا کنڈآن الیکٹرک بائیک آتا کاریم اٹ اتنگ ءِ مچ آ ملک اٹی لس کننگ نا بابت اسہ سرجم ءُ حوال ا س تننگا۔ کابینہ ءِ پاننگاکہ ملک اٹی پیٹرول اٹ چلینگوک آ موٹرسائیکل آتے ریسہ وار الیکٹرک بائیک آتے اٹ بدل کننگک۔ داوخت آ پاکستان اٹی 90 کمپنی موٹرسائیکل و آٹورکشہ جوڑ کننگ اٹی ءُ و ملک اٹی سالانہ 6 ملین موٹرسائیکل جوڑ کننگ نا لائخی ساڑی ءِ۔ دیوان اٹی پاننگاکہ پاکستان اٹی 22 کمپنی تے الیکٹرک بائیک جوڑ کننگ نا لیسن جاری کننگانے۔ دیوان ءِ پاننگاکہ پاکستان اٹی الیکٹرک بائیک آتا مون آ دننگ آن ایندھن نا مد اٹی خاطرخواہ بچت مریک۔ دیوان ءِ پاننگاکہ الیکٹرک بائیک آتا کاریم اٹ اتنگ آن نئے بیرہ ایندھن نا بچت مریک بلکن دا چاگڑد دوست الیکٹرک بائیک کاربن نا پیش تمنگ اٹ کمتی نا سوب ہم جوڑ مریک۔ وزیراعظم الیکٹرک بائیک آتا بابت آن اسہ سرجم ءُ پلان اس اقتصادی رابطہ کمیٹی ٹی پیش کننگ نا پارت جاری کرے۔ بنجائی کابینہ ، کابینہ کمیٹی سویابین نا رپورٹ نا گڈیکو منظوری ءِ تس۔ بنجائی کابینہ گورنمنٹ ٹو گورنمنٹ کمرشل ٹرانزیکشن ایکٹ 2022 نا منظوری ءِ تس۔ بنجائی کابینہ زرکاری بورڈ انا سفارش آ مچ آ ملک اٹی جوڑ اسپیشل اکنامک زون تیٹی زرکارآتے ون ونڈو آپریشن تا بابت آسراتی فراوان کننگ کن ون سٹاپ سروس ایکٹ نا صولی منظوری ءِ تس۔ بنجائی کابینہ پیٹرولیم ڈویژن نا سفارش آ تاج فیلڈ (میر پور خاص بلاک) ءِ واپاری حیثیت کن 14.11 سکوئر کلومیٹر آ تالان ایریاءِ کمرشل بنداو تیا ڈکلیئر کننگ و دابلاک نا یونائیٹڈ انرجی پاکستان لمیٹڈ (یو ای پی ایل ) ءِ 5 سال کن شونداری و پیدواری لیز انا منظوری ءِ تس۔ بنجائی کابینہ اقتصادی رابطہ کمیٹی نا 21 دسمبر 2022 و 15 نومبر 2022 آ اڈ ہلوک آ دیوان تیٹی ہلوک آ فیصلہ غاتے پک کرے۔ بنجائی کابینہ ، کابینہ کمیٹی نجکاری نا 26 دسمبر 2022 آ اڈ ہلوک آ دیوان اٹی ہلوک آ فیصلہ غاتے ہم پک کرے۔
