بی آئی ایس پی آن فائدہ ہرفوک آ5.4ملین زالبول آتا زردوئی سکریننگ تون اوار اوار اوفتا درمان ئِ وزیراعظم نا جان جوڑی انشورنس سکیم آن کرفنگک
لاہور ۔ 14مئی (اے پی پی) وزیر مملکت و چیئرپرسن بی آئی ایس پی ماروی میمن پارینے کہ بی آئی ایس پی آن فائدہ ہرفوک آ 5.4 ملین زالبول نا زردوئی سکریننگ تون اوار اوار اوفتا درمان ئِ وزیراعظم نا جان جوڑی انشورنس اسکیم آن کرفنگک۔ ہراضلع غاتیٹی دا پروگرام اف ہموڑے مخیر خواجہ غاتا کمک اٹ دا زالبول نا درمان ئِ کرفینہ۔ سیاست تینا جاگہ غا، حکومت ہر کاریم ئِ السی جوزہ اتون کننگ ئِ ، بی آئی ایس پی اسہ ماڈل ئُ ڈٹ اسے ہرادے قومی و جہانی کہول آ مون آ دننگک، او یک شنبے نا دے مرید کے ٹی بی آئی ایس پی آن فائدہ ہرفوک آ زالبول نا زردوئی سکریننگ مہم نا بناءنا وخت آ ہیت وگپ کریکہ ، ماروی میمن پارے کہ وزیراعظم نا جا ن جوڑی پروگرام نا رداٹ زالبول نا خیال تخنگ ننا زمواری ئِ ، اوپارے کہ بی آئی ایس پی بیرہ وظیفہ اسکان محدود اف بلکن زالبول و خاہوت آتا خیال ئِ تخنگ ہم ننا زمواری تیٹی اوار ئِ ، ملک انا 32ضلع غاتیٹی بی آئی ایس پی نا کمک اٹ چناتے تعلیمی وظیفہ ہم تننگ انگ ئِ ، اوپارے کہ جان جوڑی کن زیات آن زیات آگاہی لمہ نا زمواری ئِ اوپارے کہ زالبول اُرانا زیات خیال ئِ تخرہ ولے داڑتون اوار اوار اوفتے تینا جان جوڑی نا ہم تینٹ خیال ئِ تخوئی مرے انتئے کہ لمہ جان جوڑ مریک تو چناو خاہوت نا جان جوڑی ہم جوان مریک۔، اوپارے کہ زالبول نا بھلو کچ اس زردوئی سکریننگ اٹی است خواہی آن ظاہر مریک کہ زالبول اٹی دا مرض انا بارواٹی شعور ارے ، ماروی میمن پارے کہ زردوئی ٹی مبتلا زالبول بایدے مایوس مف، حکومت اوفتا درمان ئِ کرفک۔ داوخت آ وزیر مملکت گجرات یونیورسٹی نا کمک اٹ خلوک آ سکریننگ کیمپ اٹی کاریم کروک آ رضاکار آتیٹی سرٹیفکیٹ ہم بشخ وپانٹ کرے۔
