اسلام آباد۔ 27 دسمبر (اے پی پی) نیشنل ڈیزاسٹر مینجمنٹ اتھارٹی نا چیئرمین لیفٹیننٹ جنرل انعام حیدر ملک پاکستان اٹی چین نا سفیر نونگ رونگ تون اونا دفتراٹی اوڑدہی کرے۔ اوڑدہی ٹی تین پہ تینی کمکاری و پاکستان اٹی ڈیزاسٹر مینجمنٹ نا بشخ اٹی پیشگی و گچین گام گیج آتا بابت گپ وتران مس۔ چیئرمین این ڈی ایم اے نوکاپ 2022 اٹی کمکی کارروائی تیٹی چینی حکومت نا کنڈآن پبی کمکاری آ منت واری ءِ ہرفے۔ اونوکاپ آن زہمی علاقہ غاتیٹی بحالی نا ریسہ کن چین نا کنڈآن برجا کمک نا ستاءِ کرسا آخبت اٹی تکنیکی اصول آتیا استوار نیشنل ایمرجنسی آپریشن سینٹر (این ای او سی) نا جوڑ کننگ نا بابت ڈٹ انا سرجم آتے شیئر کرے ہرا غٹ کمکار و تعلقدار ادارہ، آسودہی ادارہ و جہانی ڈونر آتون مربوط مفاہمت و کمکاری اٹ خذمت سرایتک۔ چینی سفیر موسمیاتی بدلی نا سوب آن پیش بروک آ آفت آتون مون تننگ کن اسیجائی گام گیج و پاکستان تون ساڑی آ تعلقداری تے پین ودفنگ آ زور شاغا۔ اواین ڈی ایم اے و چین نا ایمرجنسی مینجمنٹ نا وزارت (ایم ای ایم) نا نیام اٹ ٹیکنالوجی و معلومداری تا ہل و تس، بنائی وارننگ سسٹم نا جوڑ کننگ و موسم نا پیش گوئی نا جاچ اتون اوار اوار پیشگی تیاری و رسپانس نا بشخ ءِ اول سر آن ٹہیفنگ کن اسہ جوان ءُ ہڑتوم آ کنڈآتا مفاہمت نامہ نا سلاہ اس پیش کرے۔ اواین ڈی ایم اے و ایم ای ایم نا نیام اٹ رابطہ قائم کننگ آ ہم زور شاغا۔
