ویتنام ڈیہہ نا اہم ئُ ملک اسے، پاکستان ویتنام تون اقتصادی و سیاسی تعلقداری خوائک
بیجنگ۔ 14مئی (اے پی پی) وزیراعظم محمد نواز شریف پارینے کہ ویتنام ڈیہہ نا اہم ئُ ملک اسے و پاکستان ویتنام تون اقتصادی و سیاسی تعلقداری قائم کننگ خوائک۔ یک شنبے نا دے بیجنگ اٹی ون بیلٹ ون روڈ فورم نا وخت آ وزیر اعظم تون ویتنام نا صدر ترانڈائی کوآنگ اوڑدہی کرے۔ داوخت آ وزیراعظم ہڑتوم آ ملک آتا تعلقداری تیٹی ودکی نا گرج آ زور شاغا و پارے کہ ہڑتوم آ ملک آتے اسہ ایلو نا کاروباری و زرکاری نا وارخواہی تیان بایدے فائدہ ہرفوئی مرے۔ وزیراعظم ہڑتوم آ ملک آتا نیام اٹ سیاسی صلابت واسیجائی واپاری کمیشن نا بابت اسیجائی وزارتی کمیشن نا کارکڑد آ است جمی نا درشانی ئِ کرے۔ اوپارے کہ پاکستان و ویتنام آسیان تون اوار ایلو جہانی فورم تیا اسہ ایلو نا مخ تفی ئِ کیک۔ اوپارے کہ ویتنام جہانی ادارہ جان جوڑی کن پاکستان نا اومیت دار ڈاکٹر ثانیہ نشتر نا پبی مخ تفی ئِ کرینے ہراڑآ پاکستان ویتنام نا منت وارئِ۔ اوویتنام نا صدر ئِ دورہ پاکستان نا سلہ ہم خلک ہرادے او امنا کرے۔
