ہڑتوم آ کنڈآتا تعلقداری تے پین گچین جوڑ کننگ کن گام گیج آتیا غور
بیجنگ۔ 14مئی (اے پی پی) وزیراعظم محمد نواز شریف تون بیلا روس نا صدر الیگزینڈر لوکاشنکو یک شنبے نا دے داڑے ون بیلٹ ون روڈ فورم نا وخت آ اوڑدہی کرے و ہڑتوم آ کنڈآتا تعلقداری تے پین گچین جوڑ کننگ کن گام گیج آتیا سجفیر۔ ہڑتوم آ ملک آک تین پہ تینی واپار ئِ ودفنگ آ خصوصی چکار تخنگ تون اوار اوار کشت و کشار، دودوربیدہ و تعلیم نا بشخ آتون اوار چندی بشخ آتیٹی زرکاری نا وارخواہی پٹنگ آ زورشاغار۔ ہڑتوم آ راہشونک علاقائی رابطہ و دانا اہمیت تون اوار اوار لس بندغ نا زند اٹی گچینی نا رداٹ گام گیج آتیا سجفیر۔ وزیراعظم ہڑتوم آ ملک آتا نیام اٹ تعلقداری تیا است جمی نا درشانی ئِ کرسا پارے کہ چنکو وخت اسے ٹی ہڑتوم آ ملک آتا نیام اٹ تعلقداریک سوگو مسنو۔ اوگدرینگوک آ سال بیلا روس نا سرکاری دورہ نا یات آتے تازہ کرسا پارے کہ ہڑتوم آ لیڈر تا نیام اٹ ایلمی پاکستان و بیلا روس نا سوگو تعلقداری تا بنداو ئِ۔ بیلا روس نا صدر وزیراعظم محمد نواز شریف ئِ اسہ وار ولدا بیلا روس نا دورہ نا سلہ خلک ہرا اودے امنا کرے۔ چین اٹی پاکستان نا سفیر خالد مسعود و بڑزکو حکومتی شخصیت آک ہم داوخت آ ساڑی ئسر۔
