اسلام آباد۔25دسمبر (اے پی پی):مزن وزیر محمد شہباز شریف ءِ پاکستان ءُ سرجمیں دگنیا ءِ مسیحی براتری ءَ را کرسمس ءِ مرادبات دیان ءَ گوشت کہ مسیحی براتری ءَ پاکستان ءِ جوڈ بوھگ ءِ وھدءَ چکاریں کرد ادا کتگ ،وانگ ءُ زانگ ،جان سلامتی ،دیمپانی ءِ ھوار لہتیں تبک ءَ مسیحی براتری ءِ ہزمت ستا لائق انت۔یک شمبے ءَ پی ایم آفس ءِ میڈیا ونگ چہ جاڑی بیان ءِ ردا مزن وزیر محمد شہباز شریف ءَ کرسمس ءِ موہ سرا وتی کلوھ ءِ تہ گوشت کہ حضرت مسیح ؑءُ حضرت مریم ؑ مسیحانی ءُ مسلمانانی میان ءَ یک وڈ انت۔اے جلیل القدر ہستی بنی آدم ءَ پہ مشعل راہ انت، اے پاکیں ہستیانی کردءِ گپ ءِ گواہی ھداوندکریم ءَ وت قران مجید ءِ تہ داتگ۔مزن وزیرءَ گوشت کہ مسیحی براتری ءَ پاکستان ءِ جوڈ بوھگ ءِ تہ چکاریں کرد ادا کتگ ، قیام پاکستان ءِ موہ سرا مسیحی براتری ءِ سروک ءَ پاکستان ءِ حق ءِ تہ ووٹ داتگ ات۔آہاں گوشت کہ مسیحانی جوڈ کتگیں وانگجاھ ءُ نادراہجاھ مروچی ھم چاگرد ءِ ہزمت ءَ دزگٹ انت۔مزن وزیر ءَ گوشت کہ آئین ءِ تہ کرسچن ءِ ھوار دراھیں اقلیتانی حقانی ضمانت داتگ انت۔آہاں گوشت کہ دراھیں اقلیت آنی جان ءُ مال ءِ رکھگ مئے اسلامیءُ آئینی زمہ واری انت۔اقلیت براتری ءَ گوں سیادی داروکیں زالبولءُ زھگانی ھوار دراھیں تبکانی دیمروئی ءُ وشھالی مئے اولی دلگوشی انت۔
