پاکستان ڈیہہ ٹی امن و سوگوی خوائک ، وزیراعظم محمد نواز شریف غٹ ہمسایہ ملک آتون دوستانہ تعلقداری تا خواہش مند ئِ
اسلام آباد۔ 14مئی (اے پی پی) ڈٹ بندی و شونداری نا وزیر احسن اقبال پارینے کہ پاکستان ڈیہہ ٹی امن و سوگوی خوائک و وزیراعظم محمد نواز شریف غٹ ہمسایہ ملک آتون دوستانہ تعلقداری تا خواہش مند ئِ۔ بی بی سی ریڈیو تون ہیت وگپ کرسا اوپارے کہ نن ڈیہہ نا غٹ ملک آتے تین پہ تینی وڑاٹ جاڑ کننگ خوانہ تانکہ چین پاکستان اقتصادی راہداری (سی پیک) آن زیات آن زیات فائدہ ہرفنگ مرے۔ اوپارے کہ گڑاس واک آک ملک اٹی شونداری نا عمل ئِ لتاڑنگ خوارہ ولے دا اوفتا کم فہمی ئِ۔ اوپارے کہ سی پیک نا کمک اٹ بلوچستان نا کم شون ہلوک علاقہ غاتے شون ہلوک علاقہ غاتون ملفنگک۔ اسہ سوج اسے نا ورندی ٹی بنجائی وزیر پارے کہ بلوچستان و سندھ دا بھلا ڈٹ آن غٹ آن زیات فائدہ ہرفرہ۔ اوپارے کہ حکومت غٹ شریدار آتا گڑتی تے مر کرینے و داسہ غٹ صوبہ غاک ڈٹ انا پورو مخ تفی ئِ کننگ ئُ۔
