اسلام آباد۔ 23 دسمبر (اے پی پی) وزیراعظم شہباز شریف پارینے کہ پاکستان تون انفارمیشن ٹیکنالوجی نا بشخ اٹی بھاز زیات کچ ارے، اخہ در ٹیلنٹ و کسب پاکستان اٹی ءِ اونا مقابلہ ٹی آئی ٹی برآمد آک بھاز کم ءُ ہرافتے ودفنگ کن اولیتی بنداو تیا کاریم کننگے۔ اوداخیال آتا درشانی ءِ جمعہ نادے آ داڑے انفارمیشن ٹیکنالوجی خاص وڑاٹ آئی ٹی نا بشخ اٹی برآمد آتا مون آ دننگ نا بابت اہم دیوان نا کماشی ءِ کرسا کرے۔ وزیراعظم پارے کہ ملک اٹی انفارمیشن ٹیکنالوجی نا بشخ اٹی بھاز زیات کچ ءِ ہرافتا پبی فائدہ ہرفنگ نا گرج ءِ۔ اوپارے کہ پاکستانی اینٹر پرنیورز آئی ٹی سیکٹر نا مون آدننگ و شونداری ٹی بھاز اہم ءُ کڑد اس ادا کرینے، ولے پاکستان نا آئی ٹی سیکٹرآتا برآمد آک پاکستان اٹی آئی ٹی سیکٹر نا ٹیلنٹ و کچ انا مقابلہ ٹی بھاز کم ءُ۔ وزیراعظم پارے کہ آئی ٹی سیکٹر نا برآمد آتے ودفنگ کن اولیتی بنداو تیا کاریم کننگ نا گرج ءِ، ہمو برآمد کنندگان ہرافک آئی ٹی برآمد آتیٹی خاطر خواہ ودکی کن کڑد ادا کریر اوفتا حکومتی کہول آ ستاءِ کننگک۔ دیوان ءِ پاننگاکہ تدوک آ سال پاکستان نا آئی ٹی برآمد آک 2.6 بلین امریکی ڈالر ئسر و پبی کوشست کننگ انگ ءِ کہ وزیراعظم نا ویژن نا رداٹ دا برآمد آتے اینخو سال 5 بلین امریکی ڈالر اسکان ودفنگک۔ دیوان ءِ پاننگاکہ غٹ آن زیات آئی ٹی برآمد ریاست ہائے متحدہ امریکہ ءِ ہِننگ ءِ ہراکہ کل آئی ٹی برآمد آتا 57 درسد ءِ۔ حوال اٹی پاننگاکہ پاکستان تون دنیا ٹی ارٹ میکو بھلا فری لانس افرادی قوت ساڑی ءِ ہرانا کچ اٹی ودکی کن پاکستان سافٹ ویئر ایکسپورٹ گام گیج کننگ ءِ۔ دیوان ءِ پاننگاکہ آئی ٹی انڈسٹری ٹی پوسکن آ مخلوق نا اواری کن یونیورسٹی تیٹی آئی ٹی نا بابت اِراسالہ ایسوسی ایٹ ڈگری پروگرام بناکننگ آ سجفنگ انگ ءِ۔ دیوان ءِ پاننگاکہ آرٹیفیشل انٹیلی جنس ، سائبر ٹیکنالوجی ، چین و کلاؤڈ ٹیکنالوجی ہم حکومتی اولیت آتا بشخ ءِ، پاکستان اٹی آئی ٹی نا بشخ اٹی پیشن نا زرکاری نا مون آ دننگ کن ٹیک ڈیسٹینیشن پاکستان نا برانڈ ءِ مچ آ دنیا ٹی درستی راستی کرفنگ انگ ءِ۔ دیوان ءِ پاننگاکہ فیڈرل بورڈ آف ریونیو آئی ٹی ایکسپورٹرآتا آسراتی کن کراچی، لاہور و اسلام آباد اٹی ہیلپ ڈیسک جوڑ کرینے، ہراکہ کمشنر آئی آر لیول نا آفیسر نا کماشی ٹی کاریم کننگ ءُ وآئی ٹی ایکسپورٹرآتے آسراتی تا فراونی کن غٹ تر گام گیج کننگ انگ ءِ۔ وزیراعظم پارت کرے کہ تعلقدار وزیر آک و آفیسر آک آئی ٹی برآمد کنندگان آتون اسہ سرجم ءُ اوڑدہی اس کیر و اوفتا غٹ ویل آتے اولیتی بنداو تیا ایسر کننگ کن گام گیج کیر۔ وزیراعظم آئی ٹی برآمد آتا ساڑی آ کچ آ بے است جمی نا درشانی ءِ کرسا پارے کہ اخہ در ٹیلنٹ و کسب پاکستان اٹی آئی ٹی نا بابت ساڑی اونا مقابلہ ٹی پاکستان آن آئی ٹی برآمدآک بھاز کم ءُ، ہرافتے ودفنگ کن اولیتی بنداو تیا کاریم کننگے و دابابت آخبت نا لائحہ عمل اس زوت آن زوت طے کننگے۔ اومستی پارت کرے کہ یونیورسٹی، اکادمیہ و آئی ٹی انڈسٹری نا نیام اٹ رابطہ غاتے گچین کننگے۔ دیوان اٹی بنجائی وزیر خزانہ و محصولات اسحاق ڈار، بنجائی وزیر واپار سید نوید قمر، بنجائی وزیر انفارمیشن ٹیکنالوجی و ٹیلی کام امین الحق، وزیراعظم نا خصوصی کمکار طارق باجوہ، جہانزیب خان، سید فہد حسین ، شزا فاطمہ و بڑزکو سرکاری آفیسر آک بشخ ہلکر۔
