وزیراعظم شہباز شریف اسلام آباد نا سیکٹر آئی 10 فوراٹی خودکش دھماکہ نا رپورٹ ءِ بٹنگا، شہید ہیڈ کانسٹیبل ءِ خراج عقیدت

اسلام آباد۔ 23 دسمبر (اے پی پی) وزیراعظم شہباز شریف اسلام آباد نا سیکٹر آئی 10 فور اٹی خودکش دھماکہ نا ترندی اٹ مذمت ءِ کرسا واقعہ نا رپورٹ ءِ بٹنگانے۔ جمعہ نادے آ  وزیراعظم آفس نا میڈیا ونگ آن جاری بیان اٹی وزیراعظم اسلام آباد پولیس نا شہید ہیڈ کانسٹیبل عدیل حسین ءِ خراج عقیدت پیش کرسا پارے کہ پولیس کارندہ غاک تینا دتر نا نذرانہ ترسا دہشت گردآتے توریر، قوم تینا نرزور آتے سلام پیش کیک۔ وزیراعظم پارے کہ مچ آ قوم اواری اٹ دہشت گردی نا چٹفنگ اسکان  جنگ ءِ برجاتخک۔ وزیراعظم واقعہ ٹی ٹھپی مروک آتون ہمدردی نا درشانی ءِ کرے و ٹھپی مروک آتے گچین طبی آسراتی فراوان کننگ نا پارت کرے۔ وزیراعظم پارے کہ الحمداللہ! کانود نافذ کروک آ ادارہ غاتا وخت آ کارروائی آن بے گناہ تا دتر ءِ وہیفوک آ بھلا و ناپاک ڈٹ  بے سہب مس، الس دہشت گردی نا چٹفنگ کن تینا فورس آتون  پبی کمک کیر۔ وزیراعظم شہید پولیس کارندہ ءِ شہداء پیکج تننگ و آئی جی اسلام آباد ڈاکٹر اکبر ناصر خان ءِ بھلو نرزوری اسے نا درشانی ءِ کروک آ کارندہ غاتے انعام و سفتی سند تننگ نا پارت کرے۔ وزیراعظم پارے کہ دہشت گرد آک پاکستان نا دشمن و الس نا خونیک ءُ۔ ارض پاک ءِ دا فتنہ غان پاک کرسا ساہ ہلینہ۔ وزیراعظم شہید عدیل حسین نا درجہ غاتا بڑزی و ٹھپی مروک آتا زوت دراخ جوڑی کن دعا کرے۔