اسلام آباد نا سیکٹر آئی ٹین فوراٹی دھماکہ، پولیس کارندہ اس شہید، 5 ٹھپی

اسلام آباد۔ 23 دسمبر (اے پی پی) بنجائی دارالحکومت اسلام آباد نا سیکٹر آئی ٹین فور اٹی بارود آن پُر ٹیکسی ءِ خودکش جلہو گیر دھماکہ اٹ ترخفے ہراٹی اسہ پولیس کارندہ اس عدیل حسین شہید، دہشت گرد و اونا سنگت زالبول دہشت گرد زوال وخت اس کہ 5پولیس کارندہ ٹھپی مسر۔ دھماکہ گلی نمبر 31 اٹی فیملی ہسپتال نا خڑک 11 بجہ ءُ 15 منٹ آ ہمو وخت آ مس ہراتم ایگل سکواڈ نا ورناک شکبر گاڈی ءِ چیکنگ کن توننگ نا کوشست کریر، دھماکہ داخہ در زور دار ئسک کہ علاقہ ٹی خوف و خلیس تالان مس، حوال ملنگ تون پولیس کمامدارآک واقعہ نا جاگہ غا سرمسر، پولیس علاقہ ءِ گھیڑ اٹی ہلکنے۔ ڈپٹی کمشنر اسلام آباد عزیز میمن و ڈی آئی جی آپریشن سہیل ظفر چھٹہ اسہ پولیس کارندہ اسے نا شہیدی، دہشت گرد و اونا سنگت دہشت گرد نا زوال کننگ ءِ پک کرسا پاریر کہ دھماکہ غان پنچ کارندہ بھاز ٹھپی مسر ہرافتے دمدستی وڑاٹ پمز ہسپتال آ گدریفنگا۔ ڈپٹی کمشنر نا رداٹ آئی ٹین فور انا علاقہ راولپنڈی تون ملحقہ ءِ ، دہشت گرد ءِ دا سیمی علاقہ غان پترینگ انگ کن آسان سمجھسا اسلام آباد اٹی تینا ٹارگٹ نا کنڈا ہنوئی ئسک  ولے سیکورٹی ہائی الرٹ مننگ نا بناء آ او سرسہب مننگ کتو۔ ڈی آئی جی سہیل ظفر چھٹہ میڈیا ءِ پارے کہ دھماکہ اسہ متکن ءُ ٹیکسی اسے ٹی مسنے ہراٹی دہشت گرد تون اونا سنگت زالبول ہم ساڑی ئسک، سیکورٹی ہائی الر ٹ مننگ نا سوب آن ایگل سکواڈ نا ورناک اودے شکبر خنسا توننگ نا کوشست کریر ولے دہشت گرد گاڈی ءِ نرفنگ نا کوشست کرے ولے ورناک اونا تعاقب ءِ کرسا آئی ٹین فور گلی نمبر 31 نا خڑک فیملی ہسپتال نا مون آ تورسا چیک کننگ نا کوشست کریر تو دہشت گرد بٹن ءِ خلسا خودکش دھماکہ کرے ہراٹی پولیس نا اسہ کارندہ اس عدیل حسین شہید مس وخت اس کہ گاڈی ٹی سُوار دہشت گرد واونا زالبول سنگت ہم موقع غا زوال کریر۔ اوپارے کہ گاڈی ٹی تخوک آ بارود بھلو کچ اسے ٹی ئسر، خوانخواستہ اگہ دہشت گرد تینا درکار ہدف اسکان سرمننگ اٹ سرسہب مسکہ تو بھلو بھسکاری اس مننگ کریکہ۔ اوپارے کہ داہیت انا داسکان معلوم مننگ کتنے کہ دہشت گرد نا اصل نشانہ یا ہدف ہراجاگہ ئسک۔ واقعہ نا حوال ملنگ تون پولیس کمامدار، ضلعی انتظامیہ و بھلو نفری اس واقعہ نا جاگہ غا سرمس و علاقہ ءِ گھیڑ اٹی ہلکر۔ اوپارے کہ دھماکہ ٹی ٹھپی مروک آ پنچ کارندہ غاتے دمدستی وڑاٹ خڑک انا ہسپتال پمزآ گدریفنگا۔ اوپارے کہ پولیس واقعہ نا جاگہ غان غٹ شاہدی تے یکجا کننگ ءِ، دھماکہ نا جاگہ غا دھماکہ خیز مواد آتے ناکارہ کروک آ عملہ ءِ ہم بٹنگا۔ اسہ سوج اسے آ اوپارے کہ دہشت گرد آک ٹیکسی ٹی بھلو کچ اسے ٹی دھماکہ خیز مواد تخاسر ہرافتا شدت نا کساس ءِ داہیت آن خلنگ مریک کہ دہشت گرد نا خودکش دھماکہ غان پد گاڈی نا گڑاک کیہی میٹر مُر تمار وخت اس کہ دہشت گرد و اونا سنگت زالبول دہشت گرد نا جسمانی عزوہ غاک مرمراسکان تالان ئسر۔ پولیس ترجمان تون رابطہ کننگ آ پاننگاکہ راولپنڈی تون ملحقہ سیکٹر آئی ٹین فور انا گلی نمبر 31 اٹی دھماکہ مس، دھماکہ نا جاگہ غان اسُل خڑک فیملی ہسپتال ساڑی ءِ۔ پاننگاکہ گاڈی ٹی بھلو کچ اسے ٹی دھماکہ خیز مواد ئسک۔ پولیس کمامدارآتون اوار اوار دھماکہ خیز مواد ءِ ڈسپوزل کروک آ عملہ ہم موقع غا سرمسنے۔ ترجمان پارے کہ شہید کارندہ نا نماز جنازہ ءِ پولیس لائن اٹی خواننگا اوکان پد میت ءِ اونا باوہ پیرہ ئی آ علاقہ آ رانہ کننگک۔