چیئر مین سینیٹ نا اسلام آباد نا سیکٹر آئی ٹین اٹی دھماکہ نا ترند انگا لوز آتیٹی مذمت

اسلام آباد۔ 23 دسمبر (اے پی پی) چیئرمین سینیٹ محمد صادق سنجرانی اسلام آباد نا سیکٹر آئی ٹین اٹی دھماکہ نا ترند انگا لوز آتیٹی مذمت ءِ کرینے۔ جمعہ نادے آ سینیٹ سیکرٹریٹ آن جاری بیان نا رداٹ چیئرمین سینیٹ دھماکہ ٹی شہید مروک آ پولیس کارندہ نا خاہوت تون ہمدردی نا درشانی ءِ کرینے۔ چیئرمین سینیٹ دھماکہ ٹی شہید آتا درجہ غاتا بڑزی و ٹھپی مروک آتا زوت دراخ جوڑی کن دعا کرے۔ چیئرمین سینیٹ تعلقدار ادارہ غاتے ٹھپی مروک آتے گچین طبی آسراتی فراوان کننگ نا پارت کرینے۔ چیئرمین سینیٹ صادق سنجرانی پارے کہ دہشت گرد آک تینا ناپاک مسخت آتیٹی اسُل سرسہب مننگ کپسہ۔ دہشت گردی نا واقعہ غاک ننا حوصلہ ءِ شیف شاغنگ کپسہ ۔ اوپارے کہ دہشت گرد آک تخریبی کارروائی تے اٹ پاکستان اٹی شونداری نا عمل ءِ لتاڑنگ نا بے سہب کوشست کننگ اٹی ءُ۔ دہشت گردآک مچ آ انسانیت نا دشمنک ءُ۔ پاکستان دہشت گردی ءِ ماس کش کننگ کن سنبرینگوک ءِ۔ ڈپٹی چیئرمین سینیٹ مرزا محمد آفریدی، قائد ایوان سینیٹ سینیٹر اسحاق ڈار، قائد حزب اختلاف سینیٹ سینیٹر ڈاکٹر شہزاد وسیم نا ہم سیکٹر آئی ٹین اٹی دھماکہ نا ترند انگا لوز آتیٹی مذمت ءِ کرینو۔