زرگزران نا گچینی ، ایندھن نا مد اٹی درآمدی بل اٹی کمتی کن شمسی توانائی نا مون آ دننگ المی ءِ، وزیراعظم شہباز شریف نا دیوان آن تران

اسلام آباد۔ 22 دسمبر (اے پی پی) وزیراعظم محمد شہباز شریف پارینے کہ شمسی توانائی وخت انا اہم ءُ گرج اسے ، زرگزران نا گچینی و ایندھن نا مد اٹی درآمدی بل اٹی کمتی کن شمسی توانائی نا مون آ دننگ المی ءِ، شمسی توانائی آ گدریفنگ آن سرکاری ادارہ غاتا بجلی نا بل آتیٹی خاطرخواہ کمتی مریک۔ داخیال آتا درشانی ءِ او ملک اٹی شمسی توانائی نا مون آ دننگ نا بابت دیوان نا کماشی ءِ کرسا کرے۔ دیوان اٹی بنجائی وزیر خزانہ و محصولات اسحاق ڈار، بنجائی وزیر واپار سید نوید قمر، بنجائی وزیر توانائی انجینئر خرم دستگیر ، سلاہکار وزیراعظم احد چیمہ ، وزیراعظم نا خصوصی کمکار محمد جہانزیب خان، طارق باجوہ و بڑزکو سرکاری آفیسر آک بشخ ہلکر۔ وزیراعظم دیوان آن تران کرسا پارے کہ شمسی توانائی ساف و اڑزان بجلی دوئی کننگ نا گچین ءُ ذریعہ اسے ، و وخت انا اہم ءُ گرج اسے۔ وزیراعظم پارے کہ زرگزران نا گچینی و ایندھن نا مد اٹی درآمدی بل اٹی کمتی کن شمسی توانائی نا مون آ دننگ المی ءِ۔ اومستی پارے کہ نجی کہول آ ہم شمسی توانائی نا کاریم اٹ اتنگ ءِ مون آ دننگ نا بابت المی گام گیج کننگے۔ دیوان اٹی پاننگاکہ بنجائی کابینہ مچ آملک اٹی کبین ایندھن نا جاگہ غا شمسی توانائی آن بجلی ودی کننگ نا بابت فریم ورک اس منظور کرینے۔ حوال اٹی مستی پاننگاکہ نیشنل الیکٹرک پاور ریگولیٹری اتھارٹی دا تُو انا ایسر اسکان شمسی توانائی نا بھلو پروجیکٹ آتا ٹیرف نا تعین ءِ کیک اوکان پد گیگ بدل توانائی نا شونداری نا بورڈ انا کنڈآن زرکار آتیان بولی طلب کننگک ۔ حوال اٹی مستی پاننگاکہ شمسی توانائی آن بجلی ودی کننگ نا بابت مسہ ڈٹ آ سجفنگ انگ ءِ ہرافتے ٹی 1200 میگاواٹ نا ڈٹ لیہ ٹی وخت اس کہ 600 میگاواٹ نا ڈٹ مظفر گڑھ و تریم آتیٹی خلنگک۔ وزیراعظم پارت کرے کہ دا بابت آرایف پی و بڈنگ نا کاریم ترند تر و شفاف کننگ نابابت غٹ تعلقدار محکمہ غاک المی گام گیج کیر۔ دیوان ءِ وزیراعظم نا بنجائی حکومت نا مچ آملک اٹی ساڑی ماڑی نا شمسی توانائی آ گدریفنگ نا ویژن آہم حوال تننگا۔ دیوان ءِ پاننگاکہ بنجائی حکومت نا ماڑی تا شمسی توانائی آ گدریفنگ نا بابت ماہر کنسلٹنٹ آتا خذمت دوئی کننگانے۔ وزیراعظم پارت کرے کہ دا چرجوئی ٹی غٹ بنجائی ادارہ غاتیکن سینٹر لائزڈ پروکیورمنٹ ءِ اختیار کننگے ہراکہ گچین و شفاف مرے۔ وزیراعظم پارت کرے کہ دا چرجوئی ٹی بنااسلام آباد نا دنگ اٹی بنجائی حکومت نا ماڑی تیان کننگے و اوکان پد مچ آ ملک اٹی ساڑی سرکاری ماڑی تے شمسی توانائی آ گدریفنگے۔ وزیراعظم پارت کرے کہ  باسنی نا موسم نا بناکننگ آن مست سرکاری ماڑی تا شمسی توانائی آ گدریفنگ ءِ پک کننگے۔ وزیراعظم پارے کہ شمسی توانائی آ گدریفنگ آن سرکاری ادارہ غاتا بجلی نا بل آتیٹی خاطر خواہ کمتی مریک۔