صدر ڈاکٹر عارف علوی نا کیڈٹ کالج کوہلو نا کیڈٹس آتون اوڑدہی ٹی گپ وتران

اسلام آباد۔ 22 دسمبر (اے پی پی) صدر مملکت ڈاکٹر عارف علوی پارینے کہ سیاسی سرکڑدہ غاتا کنڈآن بلوچستان نا الس تون شیفکو کہول آ رابطہ غاتے ودفنگ نا گرج ءِ، بلوچستان نا شونداری کن اونا انسانی و قدرتی وسیلہ غاتیا زرکاری کروئی مریک، ریکوڈک و ایلو ڈٹ آک بلوچستان ءِ گونڈ ءُ وخت اسے ٹی شونہال جوڑ کننگ کیرہ۔ داخیال آتا درشانی ءِ او پنچ شنبے نادے آ تعلیمی دورہ غا بروک آ کیڈٹ کالج کوہلو، بلوچستان نا کیڈٹ آتون اوڑدہی ٹی کرے۔ صدر مملکت پارے کہ سیاسی سرکڑدہ غاتا کنڈآن بلوچستان نا الس تون شیفکو کہول آ رابطہ غاتے ودفنگ نا گرج ءِ ، بلوچستان نا شونداری کن اونا انسانی و قدرتی وسیلہ غاتیا زرکاری کروئی مریک۔ اوپارے کہ قومی و صوبائی سرکڑدہ غاک الس تون سوگو سیاسی تعلقداری استوار کیر، بلوچستان نا ورناتے صوبائی و قومی شونداری ٹی کڑد ادا کننگ نا قابل جوڑ کننگ نا گرج ءِ۔ اوپارے کہ بلوچستان معدنیات آن شُپ ءُ صوبہ اسے ، مخلوق باصلاحیت و لائخ ءُ، ریکوڈک تون اوار ایلو ڈٹ آک بلوچستان ءِ گونڈ ءُ وخت اسے ٹی شونہال کننگ کیرہ، بلوچستان نا قدرتی وسیلہ غاتے گچین جہانی وڑوڈول ءِ تینا کرسا شون تننگ مریک۔ اوپارے کہ تینائی گری و وڈی خوری نا چٹفنگ، میرٹ و شفافیت نا مون آ دننگ قوم انا جوڑ کننگ کن المی ءِ، مستین نا ردینک آتیان سبخ ہیل کننگ، جندی فائدہ و اناءِ بایدے ہِلنگے۔ اوپارے کہ سائنس و ٹیکنالوجی، جوان پرورش و تینا بروک آ چین تا کڑد سازی آ چکار کننگے، سیاسی سوگوی و پالیسی تا تسلسل مالی، راجی و اقتصادی سوگوی نا دوئی کننگ، واپار وزرکاری نا مون آ دننگ نا کنجی ءِ۔ غٹ اسٹیک ہولڈر آک تینا انا و انتہائی رویہ ءِ اسہ کنڈتخر، عظیم تر قومی فائدہ غاتے مقدم تخر۔ صدر مملکت پارے کہ طالب علم آک مچ آ زند علم انا دوئی کننگ ءِ برجاتخر، تینا لائخی تے پدریسہ مون آ اتیر، طالب علم آک تینا اخلاقی و خاہوتی قدر ءِ برقرار تخسا سہی اولیت آتا تعین ءِ کیر۔ صدر مملکت آب اٹ گریجویٹس تیار کننگ آ پاکستان نا کیڈٹ کالج آتا ستاءِ کرے۔