پاکستان دہشت گردی نا واقعہ غاتا بابت اوغانستان نا عبوری حکومت تون پدریسہ رابطہ ٹی ءِ، ترجمان دفترخارجہ

اسلام آباد۔ 22 دسمبر (اے پی پی) دفترخارجہ نا ترجمان ممتاز زہرہ بلوچ پارینے کہ پاکستان دہشت گردی نا واقعہ و سیم پار تشدد نا دُوارہ کاٹم ہرفنگ نا بابت اوغانستان نا عبوری حکومت تون پدریسہ رابطہ ٹی ءِ، اومیت ءِ کہ اوغان کمامدارآک پاکستان تون کروک آ قول آتے پورو کننگ کن کاریم کیرہ و تینا گل زمین ءِ ہمسایہ ملک انا برخلاف کاریم اٹ اتنگ کن اِلیپسہ۔ ننے بھارت اٹی انتہاپسند قوم پرستی نا عروج و ڈیہہ کن اونا توسیع پسندانہ عزم آ گڑتی ءِ۔ داخیال آتا درشانی ءِ او پنچ شنبےنادے آ ہفتہ وار پریس حوال اٹی کرے۔ ترجمان دفترخارجہ چمن نا علاقہ سپین بولدک اٹی پاکستان و اوغانستان نا سیکورٹی فورس آتا نیام اٹ جھیڑہ غاتا بابت اسہ سوج اسے نا ورندی ٹی پارے کہ نن داوڑنا واقعہ غاتا توننگ کن اوغانستان تون جوڑ ادارہ جاتی وڑوڈول آتے برجاتخنگ آ امنا کرینن۔ ترجمان پارے کہ پاکستان اوغان کمامدارآتون داہیت انا درشانی ءِ کرینے کہ شاری تا رکھ ہڑتوم آ فریق آتا زمواری ءِ۔ اوپارے کہ پاکستان اوغانستان تون تینا برادرانہ تعلقداری تے برقرار تخنگ و امن  ءِ پک کننگ کن سنبرینگوک  ءِ، پاکستان ہمسایہ ملک اوغانستان تون اوار جہانی شریدار آتون گپ وتران ءِ برجاتخانے تانکہ داہیت ءِ پک کننگ مرے کہ اوغان گل زمین آن مروک آ دہشت گردی پاکستان آ اثرانداز مننگ کپک۔ اواومیت ظاہر کرے کہ اوغان کمامدار آک پاکستان تون کروک آ قول آتے پورو کننگ کن کاریم کیرہ و تینا گل زمین ءِ ہمسایہ ملک انا برخلاف کاریم اٹ اتنگ کن اِلیپسہ۔ پاکستان اوغانستان نا نیام اٹ گپ وتران نا پس منظر اٹ تحریک طالبان پاکستان (ٹی ٹی پی) نا مقابلہ ءِ کننگ کن چین آن استفادہ نا بارواٹی سوج آ ترجمان پارے کہ پاکستان و چین خڑکی سٹریٹجک شریدار ءُ و نن انسداد دہشت گردی و اوغانستان نا حالیت آتون اوار غٹ است خواہی نا امور آ اسہ ایلو تون مشورہ کینہ۔ وزیر خارجہ بلاول بھٹو زرداری نا عہدہ ءِ سنبھالنگ آن پد درملکی دورہ غاتا کچ انا بارواٹی اَریفوک آ سوج انا ورندی ٹی ہمو ملک آتا لڑ ءِ پیشش کرے ہرافتے ٹی سعودی عرب (اِرا وار) ، متحدہ عرب امارات (اِراوار) ، امریکہ (مسہ وار) ، چین (اِرا وار، سوئٹزر لینڈ، ایران ازبکستان(اِراوار) ، کمبوڈیا، ازبکستان ، جرمنی ، مصر ، انڈونیشیا و سنگاپور نا اسہ اسہ وار دورہ اوار ءِ۔ پیشن نا ملک پاکستانی مششن تے تنخواہ تا ادائیگی ٹی تاخیر نا ورندی ٹی ترجمان دفترخارجہ پارے کہ تنخواہ تا فراوانی نا عمل ءِ بحال کننگانے ہرادے وزارت خزانہ، اسٹیٹ بینک و جہانی چینل آتا بابت ’’بھاز پیچیدہ ‘‘ ویل انا سوب آن معطلی تون مون تروئی تما۔ زوت ہی غٹ مشن آتون درکار فنڈز مریک۔