اگہ گورنر نا پرمان ءِ مننگپک تو پنجاب اٹی گورنر راج لگنگ کیک، رانا ثناء اللہ

لاہور ۔ 22 دسمبر (اے پی پی) بنجائی وزیر داخلہ رانا ثناء اللہ پارینے کہ اگہ گورنر نا پرمان ءِ مننگپک تو پنجاب اٹی گورنر راج لگنگ کیک، پرویز الٰہی آئینی وڑاٹ وزیراعلیٰ سلتنے، پرویز الٰہی کابینہ دیوان آن مست ڈی نوٹیفائی بایدے مرے، ہندا آئینی و کانودی خواست ءِ، داسہ پوسکن آ وزیراعلیٰ پنجاب کن ہندن کہ گورنر آرڈر ایشو کیک اوڑا عملدرآمد مریک۔ داخیال آتا درشانی ءِ او پنچ شنبےنادے آ داڑے گورنرہاؤس نا پیشن میڈیا تون گپ وتران کرسا کرے۔ بنجائی وزیر داخلہ رانا ثناء اللہ پارے کہ ساڑی سیاسی حالیت آتیٹی پنجاب نا بٹنگوک آ دیوان نا ہچ ءُ کانودی حیثیت اس اف، گورنر ہاؤس نا پیشن پی ٹی آئی  ہڑدڑ کرے تو اونا پورو بست وبند ءِ کرینن۔ اوپارے کہ پرویز الٰہی داسہ اسمبلی تے پرغنگ نا ایڈوائس گدریفنگ کپک، اسہ بندغ اس وار اوار آ تینا ضد و انا غا اسمبلی تے پرغنگ نا پڑو کننگ ءِ، پرویز الٰہی تینٹ دا پارینے کہ 99 درسد باسک آک اسمبلی تے پرغنگ نا حق اٹی افس۔ اوپارے کہ اسپیکر نا صدر ءِ نوشتہ کروک آ چٹھی نا ہچ ءُ آئینی حیثیت اس اف، گورنر آئین نا کنڈآن تروک آ واکداری تے کاریم اٹ اتنگ ءِ ، گورنر ہرا وخت کہ خوائے وزیراعلیٰ ءِ پت انا وونٹ انا پاننگ کیک، پرویز الٰہی بطور وزیراعلیٰ تدوک آ دے پت انا وونٹ ہلتو ہنداخاطران پرویز الٰہی داسہ آئینی وڑاٹ وزیراعلیٰ پنجاب سلتنے۔ اوپارے کہ وزیراعلیٰ پرویز الٰہی ءِ ڈی نوٹیفائی کننگ نانوٹیفکیشن گورنر نا کنڈآن جاری مرے، گورنر پنجاب نا کنڈآن نوٹیفکیشن اسہ رسمی ءُ کارروائی اسے ہرازوت آن زوت پورو مرے، ہندن کہ گورنر نوٹیفکیشن جاری کیک اوڑا عملدرآمد مریک، فیصلہ غا عملدرآمد مفنگ آ گورنر بنجائی حکومت ءِ گورنر راج اکن نوشتہ کننگ کیک یا ایلو دروشم اٹ کابینہ نا منظوری آن پنجاب اٹی اِرا تُواکن گورنر راج لگنگ کیک و اسہ قرارداد اسے نا کمک اٹ اودے شش تُو اسکان ودکی ہم تننگ مریک۔ اوپارے کہ پی ٹی آئی تدوک آ شش ہفت تُو آن اسلام آباد تون اوار ملک انا چندی بشخ آتیٹی برانز نا دروشم اٹ بے چیٹی تالان کننگ نا کوشست کننگ ءِ اگہ او گورنر ہاؤس اٹی ہم ہڑدڑ کننگ نا کوشست کرے تو اودے پبی وڑاٹ توننگک۔