بیلاروس انا کنڈآن نوکاپ زہمی تیکن گدریفوک آ کمکی گڑا ک اسلام آباد بالی پٹ آ سرمسر

اسلام آباد۔ 22 دسمبر (اے پی پی) بیلاروس نا کنڈآن پاکستانی  نوکاپ زہمی تیکن انسانی ہمدردی نا بنداو آ گدریفوک آ کمکی گڑا ک اسلام آباد نا جہانی بالی پٹ آ سرمسر ہرافتے بیلاروس نا وزارت ہلہلہ ئی حالیت بیلاروس نا صدر و حکومت نا پارت آ گدریفیس۔ بیلاروس نا سفارت خانہ نا کنڈآن جاری بیان نا رداٹ کارگو آئی ایل 76 ٹرانسپورٹ جہاز اٹی بیلاروس نا وزارت ہلہلہ ئی حالیت نا نائب وزیر، و جہانی خذمت آتا بشخ انا میجر جنرل ایگوربولوٹوف نا کماشی ٹی اسہ ڈل اسے تون  اوار اسلام آباد انٹرنیشنل  بالی پٹ آ سرمسر۔ کارگو نا وزن 27.7ٹن وزنی و مالیت 4 لکھ ڈالر آن زیات ئس۔ دافتے ٹی فریم ٹینٹ، پٹرول پمپنگ پلانٹ، ڈیزل جنریٹر ، کمبل ، دوائی، چناو بھلا تیکن پچ، سفائی کن کٹس، دیر انا کنڈیشننگ و جراثیم کشی، ہینڈ سینیٹائزنگ و ایمرجنسی ڈس انفیکشن نا دوائیک اوار ئسر۔ پاکستان و جمہوریہ بیلاروس نا نیام اٹ سفارتی تعلقداری تا بنا 3 فروری 1994 آ مس، ہڑتوم آتا نیام اٹ دوستانہ تعلقداری ءِ ہرا کثیر جہتی شریداری نا دروشم اختیار کرینے۔ ہڑتوم آ ملک آتا نیام اٹ ہڑتوم آ کنڈآتا واپار نا کچ تدوک آ 15 سال اٹی اوسطا 50 آن 120 ملین ڈالر سالانہ ئسک۔ بیلارس و پاکستان جہانی و علاقائی ایجنڈا نا اہم ویل آتون مون تننگ کن جہانی پڑاٹ اسہ ایلو تون خڑکی کمک کننگ ءُ۔