ایل این جی نا درآمد آتیٹی مالی سال انا اولیکو پنچ تُو اٹی سالانہ بنداو تیا 17 درسد کمتی مس، ادارہ شماریات

اسلام آباد۔ 22 دسمبر (اے پی پی) ملک اٹی ایل این جی نا درآمد آتیٹی برجا مالی سال انا اولیکو 5 تُو اٹی سالانہ بنداو تیا 17 درسد کمتی ریکارڈ کننگا۔ پاکستان بیورو شماریات نا حساب وکتاب نا رداٹ جولائی آن نومبر ایل این جی نا درآمد آتا کچ 1.585ارب ڈالر ریکارڈ کننگا ہرا تدوک آ مالی سال انا ہند امد انا مقابلہ ٹی 17 درسد کم ءُ، تدوک آ مالی سال انا ہند امد اٹی ایل این جی نا درآمد آتا کچ 1.918ارب ڈالر ریکارڈ کننگاسس۔ نومبر اٹی ایل این جی نا درآمد آتیا 318 ملین ڈالر نا زرمبادلہ خڑچ مس ہرا تدوک آ سال نومبر نا مقابلہ ٹی 24 درسد کم ءُ، تدوک آ سال نومبر اٹی ایل این جی نا درآمد آتا کچ 418 ملین ڈالر ریکارڈ کننگاسس۔ اکتوبر نا مقابلہ ٹی نومبر اٹی ایل این جی نا درآمد آتیٹی ماہانہ بنداو تیا 7 درسد نا نمو ریکارڈ کننگا، اکتوبر اٹی ایل این جی نا درآمد آتا کچ 297 ملین ڈالر ئسک ہرا نومبر اٹی ودسا 318 ملین ڈالر مس۔