چین پاکستان اقتصادی راہداری نا ڈٹ ڈیہہ نا غٹ ملک آتے کن یلہ ئِ،ڈٹ انا ہچ ئُ جغرافیائی سیم اس اف
بیجنگ۔ 14مئی (اے پی پی) وزیراعظم محمد نواز شریف پارینے کہ ون بیلٹ ون روڈ انا رداٹ چین پاکستان اقتصادی راہداری نا ڈٹ ڈیہہ نا غٹ ملک آتے کن ملوکئِ و دادے بایدے سیاست نا گواچی کننگپ، داڈٹ انا ہچ ئُ جغرافیائی ئُ سیم اف، اختلاف آتیان ایڑ تر مرسا ہیت وگپ و سفارتکاری نا کمک اٹ جھیڑہ غاتے ایسر کننگ و بروک آ نسل آتے کن امن نا میرات اس ہلنگ نا وخت بسنے، ون بیلٹ ون روڈ گام دہشت گردی و انتہاپسندی نا چٹفنگ کن اسہ طاقتور ئُ سلہہ نا وڑاٹ چاہنگک۔ او یک شنبے نا دے داڑے چین نا دارالحکومت بیجنگ اٹی بیلٹ اینڈ روڈ فورم نا بڑزکو کہول انا ڈائیلاگ نا بنائی سیشن آن تران کریکہ ہرانا سرحال کمکاری عمومی ئُ شونہالی اسے۔ وزیراعظم محمد نواز شریف صفاوڑاٹ پارے کہ سی پیک ڈٹ اٹی ڈیہہ نا غٹ ملک آک اوار مننگ کیرہ دا ڈٹ آ سیاست آن پاناد کننگے۔ وزیراعظم پارے کہ ببو تین پہ تینی اختلاف آتے اسہ کنڈ تخسا پرامن مربوط و اسہ ایلو نا خیال ئِ تخوک آ ہمسایہ غاتیانبار رہینگن۔ اوپارے کہ داوخت ئِ کہ نن تینا اختلاف آتیان ایڑتر مرسا ہیت وگپ و سفارتکاری نا کمک اٹ جھیڑہ غاتے ایسر کین و بروک آ نسل آتے کن امن نا میرات اس ہلن۔ وزیراعظم پارے کہ امن و شونداری اواری اٹ چلینگ انگ اٹی ہی ممکن ئِ و ہچ گہس اقتصادی شونداری نا ہدف آتے علاقائی کمکاری آن بیدس دوئی کننگ کپک ونئے امن و سلامتی ن اکسر ئِ ہموار کننگ کیک۔ وزیراعظم پارے کہ ون بیلٹ ون روڈ انا اہمیت ہمووخت پین نمان مننگ کیک ہراتم جیو اکنامکس ئِ جیو پولیٹکس اٹی بدلیفنگ نا روایت قائم مرے و جھیڑہ غاتا بنجاکمکاری ٹی بایدے بدلینگے۔ وزیراعظم پارے کہ ون بیلٹ ون روڈ دہشت گردی و انتہاءپسندی نا چٹفنگ کن اسہ طاقتور ئُ سلہہ سے نا وڑاٹ چاہنگک۔ داڈٹ براعظم آتے ملفک و داڑآن سگ اتون اوار اوار دودوربیدہ ہی تنوع ئِ مون آ دننگ رسینگک۔ وزیراعظم پارے کہ سی پیک ون بیلٹ ون روڈ ڈٹ انا اہم ئُ ڈٹ اسے و داڑآن دے ٹکی و دیکی ایشیاءنا ہمسایہ غاک اسہ ایلو ٹی اسہ ایلو تون ملرہ۔ سی پیک ڈٹ پاکستان ئِ بین العلاقائی زرکاری و واپار نا بنجااس جوڑ کیک۔ چین و پاکستان نا نیام اٹ خڑکی سنگتی و باپت سیوتی مننگ نا حوالہ ئِ ترسا وزیراعظم نواز شریف پارے کہ اونا دا فورم اٹی ساڑی مننگ ون بیلٹ ون روڈ انا گام انا سرسہبی نا خوشی ئِ اڈتننگ و داڑکن تینا عزم انا اعادہ ئِ کروئی ئِ۔ او است جمی ظاہر کرے کہ دا تاریخی ایونٹ اقتصادی و مالیاتی کمکاری، واپاری کمکاری و السی کہول آ رابطہ غاتے کن سال آتیا محیط رہ گزر مریک۔ او چین نا صدر ژی جن پنگ و چینی سروک ئِ اونا ولولہ انگیز و تخلیقی سروک ئِ شاندار لوز آتیٹی خراج تحسین پیش کرسا پارے کہ پاکستان چین نا دا تصور نا ستائِ کیک و داراہداری ئِ مچ آ ڈیہہ کن شونداری نا کسر اس سرپند کیک۔
