حکومت آبی وسیلہ غاتا رکھ و پن بجلی نا دوئی کننگ کن آبی ڈٹ آتیٹی زرکاری ءِ ودفنگ نا حکمت عملی آ عملدرآمد نا بناءِ کرے

اسلام آباد۔ 15 دسمبر (اے پی پی) حکومت آبی وسیلہ غاتا رکھ ، دیر ءِ کوڑی کننگ نا لائخی ءِ ودفنگ و اڑزان و چاگڑد دوست پن بجلی نا دوئی کننگ کن آبی ڈٹ آتیٹی زرکاری ءِ ودفنگ کن جوان حکمت عملی آ عملدرآمد نا بناءِ کرینے، دیامر بھاشا ڈیم، مہمند ڈیم، داسو ہائیڈرو پاور پروجیکٹ و ایلو ڈٹ آتا وخت آ پوروی کن کوشست آتے ترند کننگانے۔ کے۔ فور ڈٹ انا اولیکو ریسہ نا پوروی آن 260 ملین گیلن دیر ہڑدے ئی کراچی نا شاری تے ملک، تربیلا فائیو ودکی ڈٹ آن 2025 اٹی بجلی نا پیدوار بناکیک، واپڈ انا دیر و پن بجلی نا 10 ڈٹ آتا پوروی آن 11.7ملین ایکڑ فٹ دیر ءِ کوڑی کننگ مریک و 11 ہزار 268 میگاواٹ اڑزان پن بجلی سسٹم اٹی اوار مریک۔ وزارت آبی وسیلہ نا حوالی نا رداٹ ساڑی حکومت اقتصادی شونداری و توانائی نا گرج آتے پورو کننگ کن پوسکن آ آبی کوعڑی تا تفنگ تون اوار اوار کم خڑچ و چاگڑد دوست توانائی نا دوئی کننگ کن گچین گام گیج کننگ اٹی ءِ، دا چرجوئی ٹی وزیراعظم محمد شہباز شریف تینٹ آبی ڈٹ آتا چاروکی ءِ کننگ ءِ وخت اس کہ بنجائی وزیر آبی وسیلہ سید خورشید احمد شاہ و واپڈا کمامدارآک ہم آبی ڈٹ آتے وخت آ پورو کننگ و اوفتے کن مالی وسیلہ غاتا فراوانی کن کوشست کننگ اٹی ءُ۔ وزیراعظم محمد شہباز شریف مہمند ڈیم انا دورہ ءِ کرسا ڈٹ آ کاریم نا رفتار نا تینٹ جاچ ءِ ہلک۔ مہمند ڈیم چینی و پاکستانی کمپنی اواری اٹ تفنگ اٹی ءُ، دا بھاز اہم ءُ ڈٹ اسے، داڑان 800 میگاواٹ بجلی ودی مریک، آبپاشی کن دیر دوئی مریک و نوکاپ نا توننگ اٹ کمک رسینگک، دا ڈٹ دریائے سوات آ تفنگ انگ ءِ و داڑان 18 ہزار ایکڑ آن زیات ڈغار سیراب مریک، ڈیم انا تفنگ آن نوکاپ نا توننگ اٹ کمک رسینگک۔ مہمند ڈیم اٹی دیر کوڑی کننگ نا جم لائخی 1.2 ملین ایکڑ فٹ وخت اس کہ بجلی ودی کننگ نا لائخی 800 میگاواٹ مریک۔ دا ڈٹ 2026اٹی پورو مریک۔ ڈٹ انا سوب آن نیشنل گریڈ ءِ ہرسال اوسطاََ 2.86ارب  یونٹ اڑزان و چاگڑد دوست پن بجلی فراوان کننگک۔ ڈٹ انا سالانہ فائدہ غاتا کساس 51 ارب روپئی ءِ۔ وزیراعظم منگالا ڈیم انا یونٹ پنچ و چار انا ریفربشمنٹ نا بنائی دود اٹی ہم بشخ ہلک۔ دا ڈیم انا ننا زرگزرانی شونداری ٹی بھاز اہم ءُ کڑد اسے، دانا جوڑ جاڑ، اپ گریڈیشن و ریفربشمنٹ کن یو ایس ایڈ 150 ملین ڈالر تس و فرانس 90 ملین یورونا وام فراوان کرے وخت اس کہ 65 ملین یورو پین فراوان کننگ نا ہم قول کرینے، دا 483 ملین ڈالر نا ڈٹ ءِ ہراشریداری نا گچین درشانی ءِ۔ واپڈا ہم دا ڈٹ آ 175 ملین ڈالر نا بھلو زر اس خڑچ کرینے۔ بنجائی وزیر آبی وسیلہ سید خورشید احمد شاہ دیامربھاشا ڈیم، مہمند ڈیم و تربیلا پنچ می ودکی ڈٹ آتا دورہ ءِ کرسا تعمیراتی کاریم نا پیش رفت نا جاچ ءِ ہلک و کاریم ءِ ترند کننگ نا پارت کرینے۔ اوپارے کہ وزارت آبی وسیلہ زیر تعمیر ڈٹ آتیا پیش رفت نا گچین چاروکی ءِ کیک و ڈٹ آتا وخت آ پوروی کن واپڈا ءِ پبی کمک فراوان کننگک۔ تربیلا پنچ می ودکی ڈٹ انا پیدواری لائخی اسہ ہزار 530 میگاواٹ مریک و دا ڈٹ آن 2024ء ٹی بجلی نا پیدوار بناکیک۔ پنچ می ودکی ڈٹ انا پوروی مننگ آ تربیلا غان بجلی ودی کننگ نا لائخی 4 ہزار 888 میگاواٹ آن ودسا 6 ہزار 418 میگاواٹ مریک۔ تربیلا پنچ می ودکی ڈٹ آن نیشنل گریڈ ءِ ہر سال اسہ ارب 34 کروڑ 70 لکھ یونٹ اڑزان پن بجلی دوئی مریک۔ ڈٹ آن ہرسال 15 ارب روپئی نا بریبر فائدہ دوئی مریک۔ تربیلا پنچ می ودکی ڈٹ آن بجلی نا پیدوار 2024اٹی بناکیک، مہمند ڈیم 2026اٹی پورو مریک۔ ایشین ڈویلپمنٹ بینک واپڈا پروجیکٹ آتا فنانسنگ اٹی بھاز است خواہی نا درشانی ءِ کرے۔ حکومتی و واپڈا کمامدار آتا کوشست آتیان واپڈا، سول انتظامیہ و اپر کوہستان ، لوئر کوہستان و کولائی پالس کوہستان نا مسہ ضلع غاتیان تعلق تخوک آ ہندی سرکڑدہ غاتیا تالان متحدہ کوہستان جرگہ نا نیام اٹ معاہدہ پک مسنے۔ معاہدہ نا مسخت ہندی آبادی نا راجی و اقتصادی شونداری کن واپڈا نا کنڈآن چندی شونداری اسکیم تا جاری کننگ و عملدرآمد ءِ۔ دا معاہدہ نا سوب آن داسو ہائیڈرو پاور پروجیکٹ نا تفنگ اٹی پدریسہ و سوگو بجلی نا فراوانی کن بھلو وخت اسے آن تاخیر نا گواچی دبیر ہائیڈل پاور اسٹیشن آن داسو اسکان 132 کلو وولٹ ترسیلی لائن آ تعمیراتی کاریم دمدستی وڑاٹ بحال مریک۔ کوہستان نا ہرمسٹ آ ضلع غاتیٹی دا شونداری اسکیم تا عوض ہندی مخلوق ہندا ترسیلی لائن نا تفنگ اٹ ہچ ءُ اڑاند اس شاغپسہ و اونا بے سلنگ آن پوروی ءِ پک کیرہ۔ واپڈا کوہستان نا ہر ضلع ٹی پن بجلی نا چنکو ڈٹ تفک، ہر ضلع ٹی دا ڈٹ آتا جم پیدواری لائخی 3 میگاواٹ مریک۔ واپڈا ہر ضلع ٹی اسہ اسہ ہائی اسکول و اسہ ایکو ووکیشنل ٹریننگ سینٹر اس ہم تفک۔ واپڈا سیونا ہند آ اپرکوہستان اٹی ہائی اسکول نا ماڑی ءِ اول سرآن تفک۔ ہندا وڑ ہر مسٹ آ ضلع غاتیٹی رہینگوک آ بجی نا صارف آتا 31 دسمبر 2022ء اسکان سلوک آتا پیپکو ءِ زرتس، درجہ چہارم نا ملازمت آتیا ہندی بندغ آتا بھرتی، ایلو ملازمت آتیٹی  ہندی بندغ آتا اولیت، پٹن سیری و پالس سیری ٹی دبیر خواڑ نا ترسیلی لائن نا زہمی تے معاوضہ نا ادائیگی وخت اس  کہ کیال خواڑ و داسو ہائیڈرو پاور پروجیکٹ نا زہمی تیکن ہائوس ہولڈ پیکج ہم ہندا معاہدہ نا اہم ٹک آتیٹی اوار ءِ۔ معاہدہ نا رواٹ ہندی سرکڑدہ دبیر خواڑ ہائیڈل پاور اسٹیشن آن داسو اسکان 132 کلووولٹ ترسیلی لائن آ دمدستی تعمیراتی کاریم ءِ بحال کرفرہ و داہیت ءِ پک کیرہ کہ داترسیلی لائن نا پوروی اسکان تعمیراتی کاریم بے سلنگ آ برجاسلے۔ 4 ہزار 320 میگاواٹ پیدواری لائخی تخوک داسو ہائیڈرو پاور پروجیکٹ خیبرپختونخوا نا ضلع اَپر کوہستان اٹی دریائے سندھ آ زیر تعمیر ءِ۔ دا ڈٹ اِرا ریسہ غاتیٹی پورو کننگک۔ داوخت آ واپڈادانا اولیکو ریسہ نا تفنگ اٹ اختہ ءِ، اولیکو ریسہ نا پیدواری لائخی 2 ہزار 160 میگاواٹ ءِ و دا نیشنل گریڈ ءِ ہرسال اوسطا 12 ارب یونٹ کم خڑچ و چاگڑد دوست بجلی فراوان کیک۔ ارٹ میکو ریسہ نا پیدواری لائخی ہم 2 ہزار 160 میگاواٹ ءِ و دا تینا پوروی آ نیشنل گریڈ ءِ پین 9 ارب یونٹ پن بجلی ایتک۔ ہڑتوم آ ریسہ غاتا پوروی آن پد داسو ہائیڈرو پاور پروجیکٹ نا پیدواری لائخی 4 ہزار 320 میگاواٹ مریک و دا 21 ارب بجلی یونٹ اتون اوار اوار پاکستان نا غٹ آن زیات سالانہ یونٹ تروک آ ڈٹ جوڑ مریک۔ حوالی نا رداٹ داوخت آ دیامربھاشا ڈیم پروجیکٹ نا کم و ود 10 سائٹ آتیا اسہ وخت اٹی کاریم برجاءِ۔ دا سائٹ آتیٹی ڈیم انا تفنگ کن ہڑتوم آ کنارہ غاتا خُتنگ ، ڈائی ورشن ٹنل، ڈائی ورشن کینال، پاور ان ٹیک، آخبتی پول و سٹرک آتا تفنگ اوار ءِ۔ دیامر بھاشا ڈیم انا پوروی کن 2029 نا ہدف مقرر ءِ۔ دا ڈیم اٹی دیر کوڑی کننگ نا جم لائخی 8٫1 ملین ایکڑ فٹ مریک، ہراڑان 1.23ملین ایکڑ ڈغار زیرکاشت بریک۔ ڈٹ انا بجلی ودی کننگ نا لائخی 4 ہزار 500 میگاواٹ ءِ و نیشنل گریڈ ءِ ہرسال اوسطا 18 ارب یونٹ اڑزان و چاگڑد دوست پن بجلی فراوان کیک۔ بنجائی وزیر آبی وسیلہ سید خورشید احمد شاہ 3 میگاواٹ پیدواری لائخی نا تھک ہائیڈل پاور اسٹیشن نا بناءِ کرینے۔ دا اسہ سمال ہائیڈل پاور اسٹیشن اسے ہراردے واپڈا دیامربھاشا ڈیم پروجیکٹ آ پت سازی نا گام گیج آتا رداٹ تفینے۔ دا ڈٹ آ اسہ ارب 30 کروڑ 90 لکھ روپئی خڑچ بسنے۔ دا سمال ہائیڈل پاور اسٹیشن آن ودی مروک آ بجلی کم و ود اسہ ہزار 500آن ہلیس اسہ ہزار 800 اُراتا گرج آتے پورو کننگ کن گنج اسے۔ حکومت کے۔ فور ڈٹ تخوک آ مد اٹی پورو کننگ کن کوشست کننگ ءِ۔ کے فور پروجیکٹ نا اولیکو ریسہ سندھ انا ضلع ٹھٹھہ، ملیر و کراچی غربی ٹی تفنگک۔ ڈٹ انا پی سی۔ون نا خڑچ 126 ارب 50 کروڑ روپئی ءِ۔ ترند تر پوروی کن اولیکو ریسہ ءِ ہشت پیکج آتیٹی بشخنگانے، ہرافتیان اِر اپیکج آتا کنٹریکٹ مہالو آ ن ایوارڈ کننگانو، کے فور نا اولیکو ریسہ اکتوبر 2023اٹی پورو مریک۔ حکومت آبی وسیلہ نا زیر تعمیر ڈٹ آتیکن گچین مالیاتی حکمت عملی و جہانی مالیاتی ادارہ غاتیکن زرکاری نا پرکشش وارخواہی و آسراتی مہیا کننگ ءِ۔ دا ڈٹ آتا سوب آن زرگزرانی و راجی شونداری کن کم خڑچ و چاگڑد دوست بجلی دوئی مننگ تون اوار اوار آبپاشی و کشت وکشار کن ہم وافر دیر دُوبریک۔ آبی ڈٹ آتا وخت آ  پوروی آ خاص چکار کننگ انگ ءِ و دا ڈٹ آتیا پیش رفت نا گچین چاروکی ءِ ہم پک کننگ انگ ءِ۔ دا ڈٹ 2022آن 2029اسکان ریسہ وار پورو مریک و داڑان ملک انا دیر، خور و توانائی نا سیکورٹی ءِ سوگو کننگ مریک۔