حکومت اینخو مالی سال انا اولیکو 4 تُو اٹی کل شونداری فنڈ آتا 33 درسد جاری کننگ نا موکل تس

اسلام آباد۔ 16 دسمبر (اے پی پی) بنجائی حکومت سرکاری بشخ انا شونداری پروگرام (پی ایس ڈی پی) 2022-23نا رداٹ اینخو مالی سال انا اولیکو چار تُو (جولائی آن اکتوبر ) اٹی کل شونداری فنڈ آتا 33درسد (241.26ارب روپئی ) جاری کننگ نا موکل تسنے۔ حکومت مالی سال انا اولیکو چار تُو (جولائی آن اکتوبر) اٹی بنجائی وزارت و ڈویژن آتا چندی جاری و پوسکن آ راجی بشخ انا گچینی نا ڈٹ آتیکن 727ارب روپئی نا کل جتا کروک فنڈ آتیان 241.26ارب روپئی نا شونداری فنڈ آتا بشخنگ نامنظوری ءِ تس۔ پلاننگ ڈویژن نا رداٹ بنجائی بجٹ اٹی جتا شونداری فنڈ ز اولیکو سہ ماہی (جولائی آن ستمبر) اٹی 20 درسد نا کچ اٹ جاری کننگک، اوکان پد ارٹ میکو و مسٹ میکو سہ ماہی ٹی 30 درسد نا کچ اٹ جاری کننگک۔ مالی سال نا آخیریکو سہ ماہی (اپریل آن جون) اٹی 20 درسد باقی ءِ۔ وزارت ڈٹ بندی، شونداری و اصلاحات نا جاری کروک تازہ انگا حساب وکتاب نا رداٹ، حکومت زمی جمب پوسکن تفنگ و بحالی اتھارٹی (ایرا) کن 100 بلین روپئی نا منظوری ءِ ہم تسنے۔ سرجم حوال آتا رداٹ 160.2بلین روپئی نا کل جتا زر آن 57.133بلین روپئی کارپوریشن آتے وخت اس کہ 563.3بلین روپئی نا کل جتا زر آتیان 184بلین روپئی بنجائی وزارت آتے بشخنگانے۔ نیشنل ہائی وے اتھارٹی (این ایچ اے) کن حکومت 117.2بلین روپئی نا کل جتا زر آتیان 29.9بلین روپئی بشخانے وخت اس کہ این ٹی ڈی سی /پیپکو کن حکومت 27.2بلین روپئی بشخانے۔ بنجائی حکومت 87ارب روپئی نا کل جتا کروک زر آتیان 87 ارب روپئی نا منظوری ءِ ہم تسنے ولے کابینہ ڈویژن نا شونداری ڈٹ آتیا داتم اسکان بیرہ 0.78ارب روپئی خڑچ مسنے۔ حساب وکتاب نا رداٹ ایوی ایشن ڈویژن ءِ 494ملین روپئی، و بورڈ آف انویسٹمنٹ ءِ 161ملین روپئی فراوان کننگانے۔ حکومت موسمیاتی بدلی ڈویژن کن 1.9بلین روپئی نا کاریم اٹ اتنگ نا ہم منظوری ءِ تس ہرافتیان بیرہ 38 ملین روپئی زیر جاچ مد اٹی خڑچ مسنے۔ ہائر ایجوکیشن کمیشن (ایچ ای سی ) کن حکومت 17.78ارب روپئی، صوبہ و خصوصی علاقہ غاتے کن 25.2ارب روپئی، کامرس ڈویژن کن 435ملین روپئی ، کمیونیکیشن ڈویژن (این ایچ اے آن بیدس) کن 36 ملین روپئی جاری کننگ نا منظوری ءِ تسنے۔ ڈیفنس ڈویژن کن 445 ملین روپئی، ہندا وڑ حکومت فنانس ڈویژن ءِ 286 ملین روپئی، اسٹیبلشمنٹ ڈویژن ءِ 180 ملین روپئی، فیڈرل ایجوکیشن اینڈ پروفیشنل ٹریننگ ڈویژن ءِ 1.4بلین روپئی و ہائوسنگ اینڈ ورکس ڈویژن ءِ 4.3بلین روپئی ہم فراوان کرینے۔