اسلام آباد۔ 20 دسمبر (اے پی پی) وزیراعظم نا سلاہکار امور کشمیر و گلگت بلتستان قمر زمان کائرہ پارینے کہ ننے ملک و قوم انا گچین آخبت کن تینا قومی عادت آتے بدل کروئی مریک، کفایت شعاری و توانائی بچت نا سلاہ تیا دمدستی عملدرآمد و امپورٹ بل انا مون ءِ توننگ المی ءِ، 26 آن 28 بلین ڈالر نا امپورٹ بل اٹی پدریسہ ودکی مننگ ءِ۔ سے شنبےنادے آ بنجائی کابینہ نا دیوان آن پد پریس کانفرنس آن تران کرسا وزیراعظم نا سلاہکار امور کشمیر و گلگت بلتستان قمر زمان کائرہ پارے کہ پاکستان پیپلزپارٹی تینا میرات نا رداٹ حکومت نا پبی ترجمانی ءِ کرسا بلاول بھٹو زرداری السی است خواہی تا رداٹ پاکستان نا، کشمیری تا ہندوستان اٹی رہینگوک آ مسلمان تا و ایلو اقلیت آتا مقدمہ ءِ دنیا نا مون آ تخانے، نن غٹ آن بھلا دہشت گردی نا گواچی ملک اُن، دہشت گردی آن پاکستان نا جانی و مالی نسخان غٹ آن زیات مسنے، بلاول بھٹو زرداری اقوام متحدہ نا کانفرنس اٹی ہم دا توار ءِ بڑز کرے ہرانا برخلاف ہندوستان اٹی بھلو چیہانٹ اس پیش تما، ولے انتس کہ مرے کاٹم نا بہا ءِ خل، ننے کاٹم تا پرواہ اف، پاکستان نا مقدمہ ءِ پدی مننگ کن الیپنہ، انسانیت نا مقدمہ ءِ مون آ تخنہ، ہندا ننا فیصلہ ءِ و ننے تینا لیڈر آ تینا وزیراعظم آ گمر ءِ و اینووزیراعظم و کابینہ اونا ستاءِ کرینو و مچ آ قوم اوڑتون سلوک ءِ۔ اوپارے کہ ملک داوخت آ یقینا مشکل حالیت آتیٹی ءِ، میڈیا ٹی ہم ہندا پاننگ انگ ءِکہ ملک اٹی بھاز بھلو تنکی اسے۔ اوپارے کہ اپوزیشن لیڈر عمران خان ہردے ننا زی آ و ملکی زرگزران آ اسہ پوسکن ءُ جلہو اس کیک کہ ملک ڈیفالٹ کننگ والا ءِ، داوڑکننگ آن ہچ مفک، داوخت آ قوم انا کنڈآن ہم رسپانس درکار ءِ، وخت ءُ پاس اٹی بدلی آن ہچ ءُ خرابی اس مفک بلکن دا کل ءِ سوچ بچار آن پد کننگانے، توانائی بچت گام گیج آتا سوب مخلوق نا ہم بچت ءِ، حکومت نا ہم ، فارن کرنسی نا ہم بچت مریک۔ قمر زمان کائرہ پارے کہ نن داوخت آ گیس پیشن نا خواہفنگ اُن، تیل پیشن آن خواہفنگ اُن، بجلی ودی کننگ کن کاریم اٹ اتوک آ کولا ہم کبین ءِ و دا غٹ قومی بچت ءُ ، نن نا ہشت بجہ غا کاروباری ہند آتا بندش نا سلاہ نا بابت ضرور تنقید ہم کننگک ولے دنیا نا ہراکہ شون ہلوک قوم ءِ ہرر او زوت خاچنگ و بش مروک مریک، ہراقوم تیٹی بچت نا دا قومی عادت آک ءُ ہموفک سرسہب ءُ، تیل آن ہزگار مروک آ ملک آتا مزاج جتا ءِ، حکومت دا گام گیج آتے قوم انا تکلیف آتا رداٹ کرینے۔
