اسلام آباد۔ 20 دسمبر (اے پی پی) وزیردفاع خواجہ محمد آصف توانائی نا بچت و کفایت شعاری کن توانائی بچت قومی پروگرام نا پڑو ءِ کرسا پارینے کہ توانائی بچت کن شادی ہال تے نن نا 10 بجہ غا، مارکیٹ و ریسٹورنٹ آتے نن نا 8 بجہ غا بند کننگک، سنگین زرگزرانی حالیت آتا رداٹ ننے تینا عادت آتے بدل کروئی مریک۔ او سے شنبے نادے آ بنجائی کابینہ نا دیوان آن پد بنجائی وزیر حوالکاری و شینکاری مریم اورنگزیب و وزیراعظم نا سلاہکار امور کشمیر ، گلگت بلتستان قمر زمان کائرہ تون اوار پریس کانفرنس آن تران کریکہ۔ خواجہ محمد آصف پارے کہ کفایت شعاری نا پالیسی تننگ انگ ءِ، کفایت شعاری نا بابت کمیٹی ٹی سیکرٹری پاور، وزیر دفاع تون اوار ایلو وزیر آک اوار ءُ۔ اوپارے کہ شادی ہال تے نن نا 10 بجہ غا بند کننگ نا فیصلہ کننگانے وخت اس کہ مارکیٹ و ریسٹورنٹ آتے نن نا 8 بجہ غا بند کننگک، مچ آ دنیا ٹی مارکیٹ آک شام انا 6 بجہ اسکان بند مریرہ ولے ننا داڑے نن نا 2 بجہ اسکان ملوک ءُ۔ اوپارے کہ 20 درسد سرکاری ملازم اُراغان کاریم کیرہ، چندی ذریعہ اٹ توانائی نا بچت کرسا زرگزران ءِ ارب آ تا فائدہ مریک، دا فیصلہ غان 8 آن 9 ہزار میگاواٹ بجلی نا بچت مریک و 62 ارب روپئی بچفنگ مریک۔ وزیر دفاع پارے کہ بروک آ اِرا دے اٹی توانائی بچت نا بابت صوبہ غاتیان سلاہ بٹنگک، توانائی بچت نا دا قومی ءُ پروگرام اسے۔ اوپارے کہ نن ای بائیکس درستی راستی کرفنگ والا اُن ہراڑکن الیکٹرک بائیکس آتا درآمد بناکرینے، داکان بیدس متکن آ پنکھا120 آن 130 واٹ بجلی ءِ کاریم اٹ اتیرہ، پوسکن آ پنکھا غاک کم و ود 40 آن 60 واٹ بجلی استعمال کیرہ، دا پنکھا غاتا کاریم اٹ اتنگ آن 15 ارب روپئی نا بچت مریک، ایل ای ڈی بلف آتا کاریم اٹ اتنگ آن 23 ارب روپئی نا بچت مریک، اُراتیٹی پنکھاو ایئر کنڈیشنڈ آتا کاریم اٹ اتنگ اٹی بچت آن 8 آن 9 ہزار میگاواٹ بجلی بچفنگ مریک۔ اوپارے کہ کپیسٹی پے منٹ آتا مد اٹی 28 ارب ماہانہ بچت مریک، گیس فراوان کروک آ کمپنیک گیزر کن بچت نا ازباب فراوان کیرہ، داڑان 92 ارب روپئی سالانہ نا بچت مریک، گیگ بدل سٹریٹ لائٹ آتا خلنگ آن چار ارب روپئی نا بچت مریک۔ وزیر دفاع خواجہ محمد آصف پارے کہ وزیراعظم وزیرخارجہ بلاول بھٹو زرداری نا بیان ءِ پک کرینے، وزیرخارجہ پاکستان نا الس نا ترجمانی ءِ کرے، مچ آ قوم وزیرخارجہ بلاول بھٹو زرداری ءِ خراج تحسین پیش کیک ، قوم دا بیانیہ تون سلوک ءِ۔ اوپارے کہ توشہ خانہ مرغن ءُ کِسہ اسے ، داٹی پین گڑا مون آ بریک۔ اسہ سوج اسے نا ورندی ٹی اوپارے کہ 69 درسد دیر کشت وکشار اٹی استعمال مریک، فلڈ ایری گیشن ءِ کشاری مسخت آتیکن کاریم اٹ اتنگک، واٹر ہارویسٹنگ ہم مریک، پِر انا دیر ءِ زیان آن بچفنگ کن گام گیج کننگک، صوبہ غاتے دا پالیسی و پروگرام نا بارواٹی معلومدار کینہ۔ اوپارے کہ دا قومی ءُ پروگرام اسے، نن خوانہ دادے امنائی سلاہ اٹ شروع کننگے، دے انا روشنائی ءِ کاریم اٹ اتنگ کن ننے گام گیج کروئی مریک، دفترآتا تہہ ٹی بے تحاشہ لائٹ آتے کاریم اٹ اتنگک ، داٹی ننے بچت کروئی مریک، چندی ذریعہ اٹ توانائی نا بچت کرسا ارب آ روپئی تے بچفنگ مریک، پنچ شنبے اسکان کفایت شعاری پالیسی ءِ گڈیکو دروشم اس تننگک۔ ننے تینا وسیلہ غاتے ٹی رہینگوئی مریک۔ وزیر دفاع پارے کہ شش، ہفت تُو آن داڑا کاریم چلینگاکہ، ہر چارآ صوبہ غاتون سلابت آن پد دا گڈیکو دروشم اس اختیار کیک، کفایت شعاری ننا قومی کلچر نا بشخ اس جوڑ مریک، داڑان زرگزرانی مشکل ہم چٹک۔ وزیراعظم نا سلاہکار امور کشمیر گلگت بلتستان قمر زمان کائرہ پارے کہ بلاول بھٹو زرداری پاکستان نا الس نا است خواہی تا رداٹ کشمیری الس تون اوار ہندوستان نا تہہ ٹی رہینگوک آ مسلمان و اقلیت آتا مقدمہ ءِ دنیا نا مون آ تخانے، دنیا ٹی غٹ آن زیات دہشت گردی آن نسخان پاکستان نا مسنے۔
