وزارت موسمیاتی بدلی ملک انا اولیکو قومی موافقت نا ڈٹ انا تیاری نا عمل نا بناءِ کرے

اسلام آباد۔ 19 دسمبر (اے پی پی) وزارت موسمیاتی بدلی شش تُو انا ریکارڈ مد اٹی ملک انا اولیکو قومی موافقت نا ڈٹ (ایڈاپٹیشن پلان) نا تیاری نا عمل نا بناءِ کرینے، دا ڈٹ تدوک آ دور حکومت اٹی کھٹائی ٹی تموک ئس۔ بنجائی وزیر چاگڑدی بدلی سینیٹر شیری رحمان اپریل 2022اٹی تینا عہدہ نا چارج ءِ سنبھالنگ آن پد وزارت نا کمامدارآتے پارت کرے کہ 100 دے اٹی موسمیاتی بدلی کونسل نا دیوان ءِ بٹنگے ہرانا دیوان پاکستان تحریک انصاف نا حکومت نا رداٹ اونا ٹہیفنگ آن پد اسُل متنے۔ دا ڈٹ آتا تسلسل گلوبل وارمنگ نا اثر و قدرتی آفت آتیکن ملک انا لچک و تیاری ءِ پک کننگ کن اہم ءِ۔ وزارت چاگڑدی بدلی سیوتی حکومت نا اجتماعی حکمت نا رداٹ، شش تُو انا گونڈ وخت اٹی، مصر اٹی اقوام متحدہ نا فریم ورک کنونشن آن کلائیمیٹ چینج(یو این ایف سی سی سی ) نا رداٹ 27 می کانفرنس آف پارٹیز (COP-27)نا جہانی چاگڑدی دیوان کن آب و ہوا نا بھسکاری آن بھسکار جہانی سویل نا پدتموک ملک آتا کیس ءِ تیار کرے و پیش کرے۔ بنجائی وزیر وزارت نا کمامدارآتے پارت کرے کہ او قدرتی آفت و موسمیاتی بدلی تا بابت لچکدار پالیسی ءِ پک کے ہرا ملک اٹی اولیتی بنداو تیا موافقت ءِ گچین کننگ کن راہشونی فراوان کے۔ سینیٹر شیری رحمان پارے کہ پاکستان نا جہانی کہول آ کاربن نا پیش تمنگ اٹی غٹ آن کم بشخ ءِ ولے موسمیاتی بدلی تا سوب رونما مروک آ آفت آتیان غٹ آن زہمی ملک ءِ، دا رداٹ تخفیف اونا زمواری اف ولے دا پائیدار آخبت کن گلوبل وارمنگ و چاگڑدی انحطاط اٹ موافقت ءِ پک کننگ کن گام گیج کننگ ءِ۔ اوپارے کہ موسمیاتی بدلی تیکن لچک ودی کننگ کن قومی موافقت نا ڈٹ اس تیار کننگ نا عمل بناکرینے ہرانا مسخت جوان نیام و مریس مد ڈٹ جوڑ کرسا موسمیاتی بدلی تا خطرہ غاتے کم کننگ نا ءِ۔ بنجائی وزیر پارے کہ پاکستان موسمیاتی لچک ودی کننگ کن تینا قومی کوشست آتیٹی فطرت آ تالان ایسری و چاگڑدی نظام آ تالان موافقت ءِ کاریم اٹ اتنگ ءِ۔ داکان بیدس، گرین و لچکدار شاری شونداری نا دوئی کننگ اٹ وارخواہی و چیلنج آتون مون تننگ کن موسمیاتی لچکدار شاری پالیسی نا فریم ورک اس ہم تیار کننگ انگ ءِ۔ سیوتی حکومت نا اجتماعی وژن نا رداٹ وزارت دریائے سندھ ءِ چاگڑدی انحطاط آن بچفنگ کن صوبہ غاتون سلابت آن پد لیونگ انڈس نا غٹ آن بھلا گام انا بناءِ کرے۔ جہانی بینک انا پٹ وپول اٹی پاننگانے کہ دریائے سندھ ءِ چاگڑدی انحطاط ، انسانی دخل اندازی و ایلو سرجزآتا سوب آن وجودی خطرہ غاتا مون تروک ءِ۔ وزارت چاگڑدی بدلی دریائے سندھ اٹی ودوک آ خطرہ و کم مروک دیر انا کچ آ سجفسا اونا رکھ، سفائی و بحالی نا ڈٹ آتیا کاریم کرے۔ پاکستان کاپ-27اٹی جی -27پلس چائنا گروپ نا اختہ ئی تا کماشی ءِ کرے و سرسہبی اٹ زیان و نسخان نا فنڈ آتا دیرینہ گام انا منظوری ٹی نمان کڑد ادا کرے ہرادے جہانی برادری موسمیاتی بدلی نا سوب آن غٹ آن زیات زہمی و نزور ملک آتا کماشی ٹی بھاز اہمی گام اس گوندانے۔