کفالت پروگرام نا رداٹ اینخو سال مئی آن اکتوبر اسکان49.84ارب روپئی حقدار آتیٹی بشخنگا

اسلام آباد۔ 19 دسمبر (اے پی پی) بینظیر انکم سپورٹ پروگرام (بی آئی ایس پی ) نا کمک اٹ اینخو سال مئی آن اکتوبر 2022 اسکان بے نظیر کفالت پروگرام نا حقدار آتیٹی کم و ود 49.84ارب روپئی نا زر بشخنگانے۔ کفالت پروگرام آن فائدہ ہرفوک آتا کچ ہراکہ اسہ غیر مشروط کیش ٹرانسفر (یو سی ٹی ) گام ءِ، ءِ مئی آن اکتوبر اٹی 7.2 میلن آن ودفسا 8.5 ملین کننگانے۔ سرکاری حوالی پارے کہ دا وخت آ کفالت پروگرام نا درج مروک /رجسٹرڈ فائدہ ہرفوک آتا کچ کم و ود 8.58ملین ءِ ولے ساڑی حکومت جون 2023اسکان دا کچ ءِ 9ملین اسکان ودفنگ نا ہدف مقرر کرینے۔ بی آئی ایس پی بورڈ ساڑی ہی ٹی دا پروگرام نا رداٹ خواجہ سراتے اوار کننگ کن اسہ پالیسی اسے نا منظوری ءِ تسنے ہراڑکن اوفتے نادرا غان شناختی کارڈ فارم دوئی کروئی مریک ہراٹی پیدوار وڑاٹ اوفتا جنس ءِ بطور ‘ٹرانس جینڈر’ درج کننگانے۔ ٹارگٹڈ پٹرولیم سبسڈی پروگرام نا بارواٹی حوالی "اے پی پی” ءِ پارے کہ مئی آن اکتوبر 2022اسکان دا گام انا رداٹ کم و ود 8.67ملین حقدار آتیٹی کم و ود 17.35بلین روپئی نا زر بشخنگانے۔ دا گام نیزگار و نزور خاہوت آتے ایندھن نا ودوک آ نہاد آتا اثرآتیان بچفنگ کن بناکننگاسس تانکہ بی آئی ایس پی نا ساڑی آ باقاعدہ فائدہ ہرفوک آتون اوار اوار نیشنل سوشل اکنامک رجسٹری (این ایس ای آر) ڈیٹا بیس ءِ کاریم اٹ اتسا ودکی فائدہ ہرفوک آتے 2،000روپئی نا ودکی نغد سبسڈی فراوان کننگ مرے۔ فلڈ ریلیف پروگرام نا بارواٹی سرکاری حوالی پارے کہ اگست آن اکتوبر 2022 اسکان وزیراعظم نا فلڈ ریلیف کیش اسسٹنس پروگرام نا رداٹ دا سال بھسکار نوکاپ آن زہمی مروک آ کم و ود 2.7ملین خاہوت آتیٹی کم وو د 69ارب روپئی نا زر بشخنگانے۔ بی آئی ایس پی نا کمک اٹ مچ آ ملک اٹی ساڑی آ نوکاپ آن زہمی خاہوت آتیٹی فی خاہوت 25،000روپئی نا دمدستی نغد امداد بشخنگا۔ بینظیر تعلیم وظیفہ پروگرام نا رداٹ ہراکہ اسہ مشروط کیش ٹرانسفر (سی سی ٹی ) مداخلت ءِ۔ حوالی پارے کہ پروگرام نا بناآن ہلیس داتم اسکان 10.5ملین چناتے درج کننگانے ولے ہندا مدیعنی مئی 2022آن اکتوبر 2022اسکان 1.8ملین چناتے درج کننگانے وخت اس کہ داوخت اٹی 15 ارب روپئی نا زر تعلیمی وظیفہ نا وڑاٹ بشخنگانے۔ دا پروگرام داہیت ءِ امنا کرسا بناکننگاسس کہ بی آئی ایس پی آن فائدہ ہرفوک آ اُراتیٹی بھاز انگا چناک اسکول آ ہِنپننگ ءُ ، سال 2012ٹی بی آئی ایس پی نا حقدار خاہوت آتے پرائمری تعلیم نا دوئی کننگ کن فی سہ ماہی ودکی نغد زر فراوان کرینے۔ جولائی 2021آن پروگرام نا دنگ پرائمری آن سیکنڈری و ہائیر سکینڈری کہول اسکان تالان ءِ و فی الحال مچ آ ملک اٹی کاریم کننگ ءِ۔ سی سی ٹی بے نظیر نشوو نما پروگرام نا بارواٹی سرکاری حوالی پارے کہ مئی آن اکتوبر 2022 اسکان درج مروک حقدار آتیٹی کل 162،964،000روپئی بشخنگانے۔ داپروگرام نا مسخت پڈپُر و خد تروک آ نیاڑی (پی ایل ڈبلیو) و اوفتا 2 سال آن کم وئی نا چناتیٹی سٹنٹنگ تون مون تننگ کن 2 ہزار فی پی ایل ڈبلیو فی سہ ماہی ودکی نغد زر انا فراوانی بی آئی ایس پی نا حقدار خاہوت آتا 25 ہزار روپئی فی سہ ماہی کن ءِ۔ دانا بدلہ ٹی لمہ غاتے حمل اٹی باقاعدگی اٹ ودی مننگ آن مست جان جوڑی نا جاچ و آگاہی سیشن آتیٹی بشخ ہلنگ، خصوصی غذائیت آن پبی خور انا کاریم اٹ اتنگ و تینا چناتے رکھی ٹیکہ جاٹ و جان جوڑی نا باقاعدہ جاچ اکن دننگ نا قول کننگے۔ بینظر انڈر گریجویٹ اسکالر شپ پروجیکٹ (بی یو ایس پی) نا ساڑی حالیت آتا بارواٹی حوالی انکشاف کرے کہ اسکالر شپ اکن 10 ہزار طالب علم آتے درج کرسا انرولمنٹ نا عمل پورو کننگانے۔ مالی سال 2021-22کن جتا کروک 7.346بلین روپئی نا مچ آ بجٹ مئی 2022اٹی جاری کننگاسس۔ ساڑی مالی سال ستمبر 2022اٹی جتا کروک 9.27بلین روپئی نا کل بجٹ آن 2.24بلین روپئی نا پین زرجاری کننگا۔ ہائر ایجوکیشن کمیشن (ایچ ای سی ) مچ آ پاکستان نا غٹ 132 یونیورسٹی تے زر فراوان کننگ نا عمل اٹی ءِ۔