اسلام آباد۔ 19 دسمبر (اے پی پی) صدر مملکت ڈاکٹر عارف علوی اٹلی و پاکستان نا نیام اٹ تین پہ تینی تعلقداری تے پین سوگو کننگ آ زور شاغسا پارینے کہ دفاع، کشت وکشار، انفارمیشن ٹیکنالوجی تون اوار صنعتی بشخ اٹی تعلقداری تے پین گچین کننگ نا گرج ءِ، پاکستانی آئی ٹی چاہندار آک تینا خذمت و مصنوعات آتے اٹلی و یورپ اٹی فراوان کننگ کیرہ۔ داخیال آتا درشانی ءِ او اٹلی کن پاکستان نا پندار سفیر علی جاوید تون اوڑدہی ٹی گپ وتران کرسا کرے۔ صدر مملکت پارے کہ پاکستان و اٹلی نا نیام اٹ ہڑتوم آ کنڈآتا تعلقداری تے پین سوگو کننگ کن پوسکن ءُ کسر پٹنگ مریک، دفاع، کشت وکشار، انفارمیشن ٹیکنالوجی تون اوار صنعتی بشخ اٹی تعلقداری تے پین گچین کننگ نا گرج ءِ۔ ڈاکٹر عارف علوی پارے کہ پاکستانی آئی ٹی چاہندار آک تینا خذمت و مصنوعات آتے اٹلی و یورپ اٹی فراوان کننگ کیرہ، اٹلی ٹی پاکستانی سفیر و غٹ ذیلی عملہ تینا توانائی تے پاکستانی تے مون تروک ویل آتا ایسری آ تخر، پندار سفیر اٹلی ٹی رہینگوک آ پاکستانی تے المی کمکاری و سلابت نا خذمت فراوان کیر۔ اوپارے کہ پندار سفیر پاکستان اٹی چیمبرز آف کامرس و پاکستان نا بھلا صنعتی و مینو فیکچرنگ ادارہ غاتون خڑکی رابطہ تخر، صنعتی یونٹ آتے پاکستان آ گدریفنگ کن اطالوی زرکاری آتا بایدے است بڈی ءِ کننگے، اطالوی زرکاری پاکستان اٹی اڑزان افرادی قوت، خام مال و زرکار دوست پالیسی تیان فائدہ ہرفر۔ صدر مملکت پارے کہ پاکستان و اٹلی چندی علاقائی و جہانی ویل خاص وڑاٹ اقوام متحدہ نا سلامتی کونسل اٹی اصلاحات آ اسہ وڑنا سوچ تخرہ، پاکستانی تا بھلا کچ اٹلی ٹی رہینگ انگ ءِ، اوفتا راجی آسراتی ءِ غٹ آن زیات اولیت تننگے۔
