بیجنگ۔ 14مئی (اے پی پی) چین نا صدر شی جنگ پنگ پوسکن آ سلک روڈ ڈٹ اکن 124 ارب ڈالر تننگ نا عزم انا اعادہ ئِ کرسا پارینے کہ دا آجوواپار و جامعیت تون امن نا کسر ئِ متعین کروک ئُ ڈٹ اسے۔ یک شنبے نا دے اسہ بیجنگ اٹی ون بیلٹ ون روڈ فورم انا بنائی دیوان اسے آن تران کرسا اومخاصمت و سفارتی قوت نا درشانی نا متکن آ وڑوڈول آتے چٹفنگ آ زور شاغا۔ او 2013ءٹی دا ڈٹ انا پڑو ئِ کریسس ہرانا مسخت ایشیائ، افریقہ، یورپ و ایلو ڈیہہ تا نیام اٹ ارب آ ڈالر نا بنداوی ڈھانچہ نا جوڑجاڑ آن رابطہ غاتے مون آ دننگ نا ئِ۔ چین نا صدر پارے کہ ننے کمکاری نا اسہ آزادانہ موقع اس فراوان کننگ نا ئِ و جہانی اقتصادیات ئِ بایدے مون آ دننگے، دنیا ئِ آزادانہ شونداری ئِ مون آ دننگ کن چاگڑداس جوڑ کروئی مریک و ”شفاف، معقول، جہانی واپار و زرکاری نا اصول آتیا مبنی“ نظام نا است بڈی ئِ کروئی مریک۔ داوخت آ او ڈٹ اکن پین چانڑدہ ئُ نیم ارب ڈالر تننگ نا عزم ہم کرے ہراڑآن دا ڈٹ اکن اوناکنڈآن عہد کروک زر124ارب ڈالر مسنے۔ کانفرنس اٹی روس انا صدر ولادیمر پوتن و ترکی نا صدر رجب طیب اردوان تون اوار 29ملک آتا سروک و بڑزکو عہدیدارآک شریک ئُ۔ دود آن اقوام متحدہ نا سیکرٹری جنرل انتونیو گوئتریس ہم تران کرے۔ وزیراعظم محمد نواز شریف تینا ڈل اتون اوار کانفرنس اٹی ساڑی ئِ۔
