اسلام آباد۔ 19 دسمبر (اے پی پی) سینیٹ نا قائمہ کمیٹی امور خارجہ نا چیئرمین سینیٹر فاروق حامد نائیک وزیرخارجہ بلاول بھٹو زرداری ءِ اقوام متحدہ سلامتی کونسل اٹی کشمیر ناویل ءِ تالان کننگ و انسانی حق انا بھلا خلاف ورزی تیا مودی سرکار ءِ دنیا نا مون آ بے نقاب کننگ آ خراج تحسین پیش کرینے۔ سینیٹ سیکرٹریٹ نا رداٹ دوشنبےنادے آ اسہ بیان اسے ٹی او پارے کہ بھارت نا مقبوضہ جموں وکشمیر آ غیرکانودی کوزہ، کشمیر نا ویل ءِ گچین وڑاٹ تالان کننگ و بھارتی وزیراعظم نریندر مودی ءِ ’گجرات نا قصاب‘ پاننگ آ وزیر خارجہ بلاول بھٹو زرداری دنیا نا خن تے ملانے ، بلاول بھٹو زرداری نئے بیرہ کشمیر نا ویل ءِ جہانی کہول آتالان کرینے بلکن بھارت نا حقی فاشٹ دروشم ءِ ہم دنیا نا مون آ بے نقاب کرینے۔ چیئرمین سینیٹ قائمہ کمیٹی امور خارجہ پارے کہ نریندر مودی نا ظلم انا داستان تا پژدر اٹی امریکہ ٹی نریندر مودی نا پترینگ انگ آ پابندی خلنگاسس، بلاول بھٹو زرداری اقوام متحد ہ نا ایجنڈا آ ایسر نا چاری کشمیر نا ویل انا کنڈا اقوام متحدہ نا سلامتی کونسل ءِ تینا زمواری تے پورو کننگ نا کنڈا چکار کرفینے۔ اوپارے کہ وزیرخارجہ اقوام متحدہ نا سلامتی کونسل نا فورم ءِ بھاز مہارت اٹ کاریم اٹ اتسا اقوام متحدہ نا سلامتی کونسل آ زور شاغا کہ او کشمیر نا ویل آ تینا قرارداد آتیا عملدرآمد ءِ پک کے، اوبھاز مہارت اٹ دنیا ءِ نشان تس کہ ہندوستان ، ’پن انا غٹ آن بھلا جمہوریت و اسہ سیکولر ریاست ‘ اس دراصل اسہ انتہاپسند آر ایس ایس نا کماشی ٹی مچی آنبار ءِ۔ سینیٹ نا قائمہ کمیٹی امور خارجہ نا چیئرمین بے بنداو دوبہ غاتا رداٹ نظربند حریت راہشون محمدیاسین ملک و ایلو غٹ کشمیری راہشون تا دمدستی رہائی نا خواست کرے۔ اوپارے کہ بھارت نا کنڈآن کشمیری سرکڑدہ غاتے سٹی آ مقدمہ غاتیٹی اختہ کننگ و بند کننگ نا ناپاک کوشست نئے تو کشمیری تا حوصلہ ءِ شیف شاغنگ کیک و نئے حق خودارادیت کن اوفتا روا جہد ءِ زہمی کننگ کیک۔ سینیٹر فاروق نائیک پارے کہ مودی سرکار چم آتے اٹ حق خودارادیت کن نرزور کشمیری تا جہد آجوئی ءِ زہمی کننگ کپک، جہانی برادری مسلمان و کشمیری تیا بھارت نا ظلم انا نوٹس ءِ ہلے۔ چیئرمین سینیٹ قائمہ کمیٹی امور خارجہ پارے کہ جہانی برادری مودی سرکار آ زور شاغے کہ او اقلیت خاص وڑاٹ مسلمان تا برخلاف انسانی حق انا خلاف ورزی و زیاتی تے تورے، جہانی برادری آن ہم خواست کینہ کہ او اقوام متحدہ نا سلامتی کونسل نا تعلقدار قرارداد آتا رداٹ کشمیری تے اوفتا حق ءِ ایتے۔
