عمران خان نا سیاست تحریک  انصاف ءِ بندگلی آ سرکرے، شیری رحمان

اسلام آباد۔ 19 دسمبر (اے پی پی) بنجائی وزیر ماحولیات سینیٹر شیری رحمان پارینے کہ عمران خان نا دھڑکو نا سیاست تحریک انصاف ءِ ہندن ءُ بندگلی سے آ سرکرینے ہراڑے اوڑتون سیاسی آپشن ہی چٹانے، تحریک انصاف نا باسک آک ہم عمران خان نا فیصلہ غان خوش افس۔ دوشنبےنادے آ تینا ٹویٹ آتیٹی بنجائی وزیر پارے کہ عمران خان پارلیمانی جمہوریت آ یخین تخک و نئے ڈائیلاگ آ، ہراتم نی جمہوری و آئینی سیاست نا جاگہ غا فسطائیت نا سیاست کیسہ تو ہندا انجام مریک۔ اوپارے کہ عمران خان و سیوتی تا نیام اٹ اختلاف داسہ غٹ انا مون آ بسنے، تحریک انصاف نا باسک آک ہم عمران خان نا فیصلہ غان خوش افس ۔ دانا مطلب ءِ اسمبلی تے پرغنگ نا است خواہی بیرہ اسہ ہی بندغ اسے نا ءِ۔ بنجائی وزیر پارے کہ مستین اٹ غلام اسحاق خان و ڈکٹیٹر آک اسمبلی تے پرغاسر، عمران خان نا سوچ ہم دا خواجہ غاتیان جتا اف۔ اوپارے کہ عمران ءِ تینا سیاسی بیانیہ کن کس اسے نا کس ءِ دوبہ دار گوندوئی تمک، پیشن نا سازش نا بیانیہ بے نقاب مس تو بے پتی نا دوبہ ءِ مسکوہی چیف آ خلنگ ءِ۔ اوپارے کہ اودے غلط گمانی ءِ کہ حکومت و ادارہ غاک زور اٹی برسا اونا خواست آتے امنا کیرہ، دا بندگلی آن اودے پارلیمان ہی کشنگ کیک۔