وزیراعظم نا دورہ چین، جہانی راہشون تا سروکی دیوان اٹی شرکت خوش آئند ئِ
اسلام آباد۔ 14مئی (اے پی پی) چین پاکستان کونسل نا ایگزیکٹو ڈائریکٹر ڈاکٹر فضل الرحمان پارینے کہ وزیراعظم محمد نواز شریف نا دورہ چین و جہانی راہشون و ڈل آتا سروکی دیوان اٹی ساڑی مننگ خوش آئند ئِ۔ ریڈیو پاکستان تون ہیت وگپ کرسا اوپارے کہ دااولیکو موقع ئِ کہ مچ آ دنیا نا سروک و ڈل آک دا دیوان اٹی بشخ ہلنگ کن چین اٹی یکجا مننگ ئُ و اوفتے ٹی وزیراعظم محمد نواز شریف نا تینا ڈل اتون اوار ساڑی مننگ بے کچ خوش آئند ئِ۔ اوپارے کہ چین نا اقتصادی راہداری ڈٹ انا بارواٹی سفارتی کوشست آک پایہ تکمیل اس سرمسنو و داسہ دا سفر ئِ عملی جامہ اس بیرفنگ نا گرج ئِ۔ اوپارے کہ اسہ بیلٹ اسہ روڈ انا تصور آ عمل کننگ کن چین و پاکستان نا نیام اٹ معاہدہ غاتیا بھلو کچ اسے ٹی دسخط کننگانے و دا ڈٹ آتیٹی ایلو ملک آک ہم اوار مننگ ئُ۔ ڈاکٹر فضل الرحمان پارے کہ اکنامک زون انا جوڑ جاڑ نا بابت معاملہ غاتیا دا فورم اٹی شرہ کننگک۔ اوپارے کہ سی پیک نا سوب دہشت گردی نا چٹفنگ اٹی کمک نا بابت ہریفوک آ سوج انا ورندی ئِ ترسا اوپارے کہ دا ڈٹ آن بے روزگاریی و نیزگاری چٹک ہرانا سوب دا ہڑتوم آسوب آتا باعث شدت پسندی نا بشخ جوڑ مروک آتیٹی ہم کمتی بریک ولے ننے دہشت گرد آتا برخلاف منظم وڑاٹ کوشست آتے برجاتخوئی مریک۔
