اسلام آباد۔16دسمبر (اے پی پی):راجی اسمبلی ءِ اسپیکرء ُ ڈپٹی اسپیکر ءَ آرمی پبلک وانگ جاہ پشاور ءَ شہید بوتگیں زھگ ء ُ راہ دربرآنی قربانی آناں دادء ُ سلام پیش کتگء ُگشتک کہ آرمی پبلک وانگ جاہ وئیل ءِ درد راجءِ دل ءَ تاں انگت تاجگ اِنت۔ جمعہ ءِ روچءَ وتی باین ءَ اسپیکرءَ گشتگ کہ آرمی پبلک وانگ جاہ وئیل ءَ شہید بوتگیں زھگ ء ُ راہ دربرآنی قربانی دائم ءَ یات کنگ بنت، 16 دسمبر 2014 ءِ روچ ملک ءِ راج دپتر ءِ تہا سیاہیں روچ ءِ ردءَ یات کنگ بیت، 16 دسمبر ءِ وئیل ءَ سرجمیں ملک ءَرا ژمبالینتگ، آرمی پبلک وانگ جاہ ءِ معصوم زھگ ملکی راج دپترءِتہا دائم ءَ یات کنگ بنت، من ءَ اے حاندانانی سرءَ پھر اِنت کہ آیاں اے عظیم وئیل ءَ را سگءُ اوپار کتگ، سرجمیں راج آیانی گمءَ ہوار اِنت۔ راجہ پرویز اشرف ءَگشتگ کہ اے پی ایس وئیل ءَ سرجمیں راج ءَرا ناشرکاری ءِ حلاپ ءَ یکجاہ کتگ۔ ڈپٹی اسپیکر زاہد اکرم درانیءَ اے پی ایس وئیل ءِ شہیدآناں دادءُ سلام پیش کتگء ُ گشتگ کہ مرچیگیں روچ مارا اے اندوہناکیں وئیل ءِ یاتءَ گیج ایت، 16 دسمبر 2014 ءَ ناشرکاراں آرمی پبلک وانگ جاہءَ اُرش کتگ ء ُ 132 ءَ چہ گیش معصومیں زھگ شہید کتگ اَنت، آرمی پبلک وانگ جاہ وئیلءِ درد مئے دلاں تاں انگت تاجگ اِنت، وئیلءِ تہا شہید بوتگیں زھگانی ماتءُپتاں گوں ہمدردی ءِ درشانی ءَ کناں۔ زاہد اکرم درانی ءَ گشتگ کہ اے پی ایس وئیل ءِ زھگانی حون رنگ کاراں، ناشرکارانی حلاپ ءَ جنگ تاں آیانی ہلاسیءَ برجاہ بیت۔
