اسلام آباد۔ 14 دسمبر (اے پی پی) تاجکستان نا صدر امام علی رحمان چارشنبےنادے آاِرادے ئی دورہ غا پاکستان آ سرمس۔ اسلام آباد انٹرنیشنل بالی پٹ آ بنجائی وزیر واپار سید نوید قمر پاکستان آ سرمننگ آ تاجکستان نا صدر امام علی رحمان ءِ جم وجوش اٹ بخیرکرے۔ داوخت آ اودے 21 توپ آتا سلامی تننگا و روایتی لویس اٹ ملبوس چناک گلدستہ پیش کریر۔ اودے دا دورہ نا سلہ ءِ وزیراعظم محمد شہباز شریف خلک۔ تاجک صدر دورہ ٹی چندی بشخ آتیٹی ہڑتوم آ کنڈآتا کمکاری ءِ پین سوگو کننگ آ گپ وتران کیک۔ اونا دورہ ٹی چندی ہڑتوم آ کنڈآتا معاہدہ و مفاہمت نا یات داشت آتیا دستخط مننگ نا گمان ءِ۔ پاکستان و تاجکستان دیرینہ تاریخی، دودوربیدگی و مذہبی رشتہ غاتا کمک اٹ گنڈوک ایلم ملک ءُ۔ دا تعلقداری تین پہ تینی شرف و ہم آہنگی آ تالان ءِ۔ چندی علاقائی و جہانی ویل آتیا ہڑتوم آ ملک آتا نکتہ نظر اسٹ ءِ۔ تاجکستان نیامی ایشیاٹی پاکستان نا غٹ آن خڑک ہمسایہ ءِ ہرادے بیرہ تنگ واخان راہداری آن جتا کننگانے۔ دا قربت تاجکستان ءِ نیامی ایشیاٹی پاکستان نا اسہ اہم ءُ شریدار اس جوڑ کیک۔ گمان ءِ کہ تاجک صدر نا دورہ پاکستان آن ہڑتوم آ ملک آتا نیام اٹ چندی بشخ آتیٹی کمکاری ءِ پین کڑمب کننگ و ودوک آ جیواکنامک پارٹنر شپ ءِ پین سوگوی ملک۔
