اسلام آباد۔ 14 دسمبر (اے پی پی) چیئرمین سینیٹ محمد صادق سنجرانی پارینے کہ لیبیا و پاکستان نا تعلقداری کس اسے آن اودیم اف، پاکستان اٹی افرادی قوت نا کمتی اف و لیبیا داڑان بایدے فائدہ ہرفے، ہڑتوم آ ملک آتا نیام اٹ اقتصادی واپاری، تعلیمی ودفاعی کہول آ کمکاری ءِ پین سوگوی تننگ مریک۔ سینیٹ سیکرٹریٹ آن جاری بیان نا رداٹ داخیال آتا درشانی ءِ او لیبیا نا پارلیمنٹ نا ڈپٹی اسپیکر فاروزی الطاہر النویری نا کماشی ٹی ڈل اتون گپ وتران کرسا کرے ہرا چارشنبےنادے آ داڑے اوڑتون پارلیمنٹ ہاؤس اٹی اوڑدہی کرے۔ چیئرمین سینیٹ پارلیمنٹ ہاؤس اٹی بڑزکو کمامدار آتون اوار ڈل ءِ بخیرکرے۔ اوڑدہی ٹی تین پہ تینی است خواہی نا امور، ہڑتوم آ کنڈآتا کمکاری، پارلیمانی و واپاری کہول آ ڈل آتا ہن و بر اٹی ترندی اتنگ آ گپ وتران کننگا۔ داوخت آ چیئرمین سینیٹ پارے کہ لیبیا و پاکستان نا تعلقداری کس اسے آن اودیم اف، لیبیا نا مخلوق بھلو است والوں ءُ۔ پاکستانی قوم لیبیا نا صدر نا دورہ پاکستان نا چاری ءِ۔ اوپارے کہ پاکستان و لیبیا نا نیام اٹ سرکاری و ڈپلومیٹک پاسپورٹ آ بیدس ویزا سفر نا آسراتی نا معاہدہ آ عملدرآمد بایدے مرے۔ پاکستان اٹی افرادی قوت نا کمتی اف و لیبیا داڑان بایدے فائدہ ہرفے۔ لیبیا پاکستان نا نیام اٹ ادارہ جاتی کمکاری رابطہ غاتے پین سوگو کننگ اٹ کمکار مریک۔ چیئرمین سینیٹ پارے کہ ہڑتوم آ ملک آتا نیام اٹ اقتصادی ، واپاری ، تعلیمی و دفاعی کہول آ کمکاری ءِ پین سوگوی تننگ مریک۔ چیئرمین سینیٹ پارے کہ بڑزکو کہول ڈل انا دورہ غان ہڑتوم آ ملک آتا نیام اٹ کمکاری نا دنگ ءِ ودفنگ رسینگک، اومیت ءِ دا دورہ السی کہول آ رابطہ غاتے مون آ دننگ اٹ اہم پیش خیمہ اس جوڑ مریک۔ صادق سنجرانی پارے کہ پاکستان و لیبیا نا نیام اٹ زرگزرانی تعلقداری آن ہڑتوم آ کنڈآتا کمکاری ءِ پین مون آ دننگ ملک۔ ہڑتوم آ ملک آتا نیام اٹ زرگزرانی و واپاری و پارلیمانی رابطہ غاتا مون آ دننگ آن علاقائی شونداری ٹی نمان پیش رفت مریک۔ پاکستان و لیبیا نا نیام اٹ برادرانہ تعلقداری تین پہ تینی قدر و اسیجائی اقتصادی فائدہ غاتیا تالان ءِ۔ چیئرمین سینیٹ ہڑتوم آ ملک آتا نیام اٹ مستین اٹی بڑزکو کہولی ڈل آتا ہن و بر نا ہم ذکر ءِ کرے۔ اوپارے کہ پارلیمانی تعلقداری نا مون آ دننگ آن زرگزرانی و اقتصادی بشخ آتیٹی کمکاری و رابطہ کاری ءِ سوگوی ملک، پاکستان افریقی ملک آتون رابطہ کاری نا مون آ دننگ ءِ پین سوگو کننگ نا چرجوئی ٹی کوشست کننگ ءِ، پاکستان افریقی ملک آتون ہڑتوم آ کنڈآتا تعلقداری تے پین سوگو کننگ کن ’’لک افریقہ‘‘ پالیسی آ کارفرماءِ۔ اوڑدہی ٹی ڈپٹی اسپیکر فاروزی الطاہرالنویری پارے کہ پاکستان آ برسا بھاز خوشی محسوس کننگ اٹی اُٹ۔ لیبیا نا الس پاکستان تون مہرومریبت کیک۔ ڈپٹی اسپیکر فاوزی الطاہر النویری چیئرمین سینیٹ ءِ لیبیا نا دورہ نا سلہ ہم خلک۔ ڈپٹی اسپیکر فاوزی الطاہر النویری پارے کہ لیبیا و پاکستان ہڑتوم آ قدرتی وسیلہ غاتیان شُپ ءُ۔ قدرتی وسیلہ غاتا گچین کاریم اٹ اتسا اسہ ایلو نا گرج آتے پورو کننگ مریک۔ پاکستان اٹی ساڑی زرکاری نا وارخواہی تیان فائدہ ہرفنہ۔ اوپارے کہ پاکستان نا دورہ ءِ کرسا است اٹ خوشی مس، لیبیا، پاکستان تون تینا متکن آ برادرانہ تعلقداری تے بھاز اہمیت ایتک، ہڑتوم آ ملک آتانیام اٹ پارلیمانی کہول آ تعلقداری تے پین مون آ دننگ نا خواہندار ءِ
