اسلام آباد۔ 14 دسمبر (اے پی پی) بنجائی وزیر قومی جان جوڑی عبدالقادر پٹیل پارینے کہ جان جوڑی نا بشخ اٹی بھلو کچ اسے آ اصلاحات نا عمل برجاءِ، ڈاکٹر آتا ویل آتے اولیتی بنداو تیا ایسر کننگ اٹی اُن، پاکستان میڈیکل کمیشن ناگلگت بلتستان اٹی پوسکن ءُ شاخ اس ملنگ اُن۔ چارشنبےنادے آ وزارت جان جوڑی آن جاری بیان نا رداٹ بنجائی وزیر جان جوڑی عبدالقادر پٹیل گلگت بلتستان نا ڈاکٹر آتے خوشخبری ترسا پارے کہ داسہ اوفتے تینا ویل آتا ایسری کن اسلام آباد آ بروئی تمپک، پاکستان میڈیکل کمیشن نا گلگت بلتستان اٹی پوسکن ءُ شاخ اس ملنگ نا فیصلہ ءِ کرینن۔ او پارے کہ گلگت بلتستان نا ڈاکٹرآتا ویل آک داسہ اوفتا تینا درگہ غا ایسر مریرہ۔ الس ءِ سہی و حقی وڑاٹ ریلیف تننگ کن سنبرینگوک اُن، نن عملی کاریم و کارکڑد آ یخین تخنہ۔ عبدالقادر پٹیل پارے کہ ڈاکٹر آک ننا راج اٹی مسیحا نا درجہ تخرہ، ڈاکٹر آتا ویل آتے اولیتی بنداو تیا ایسر کننگ ننا اولی مسخت ءِ۔ اوپارے کہ پیپلزپارٹی خذمت نا سیاست آ یخین تخک، نن السی مخلوق اُن، الس نا خذمت ءِ کرسا است ءِ سکون ملک ہراڑان خداہم راضی مریک۔ بنجائی وزیر پارے کہ جان جوڑی نا بشخ اٹی بھلو کچ اسے آ اصلاحات کننگ انگ ءِ، دا اصلاحات آتیٹی جان جوڑی نا بشخ آ مثبت اثرتمک
