اسلام آباد۔ 13 دسمبر (اے پی پی) چیئرمین سینیٹ محمد صادق سنجرانی پارینے کہ پاکستان قازقستان تون تینا تعلقداری تے بھاز اہمیت ایتک، پوسکن گچین مروک آ صدر قازقستان نا راہشونی ٹی قازقستان شونداری و شونہالی نا پوسکن آ بڑزی تیا سرمریک و پاک ۔ قازقستان سنگتی پین سوگو مریک۔ داخیال آتا درشانی ءِ او قازقستان نا مجلس پارلیمان نا چیئرمین کوشانوف یرلان زاکانووچ و اونا ڈل اتون گپ وتران کرسا کرے ہرافک سے شنبے نادے آ پارلیمنٹ ہاؤس اٹی اوڑتون اوڑدہی کریر۔ اوڑدہی ٹی چیئرمین سینیٹ ڈل ءِ قازقستان نا یوم آجوئی آ پیشگی مبارکباد پیش کرے۔ اوہڑتوم آ ملک آتا نیام اٹ دا سال فروری ٹی سفارتی تعلقداری تا جوڑ مننگ نا 30 سال پورو مننگ آ مبارکباد ہم پیش کرے۔ داوخت آ چیئرمین سینیٹ پارے کہ پاکستان قازقستان تون تینا تعلقداری تے بھاز اہمیت ایتک۔ قاسم جومارت توکائیو نا کماشی آ پت کننگ و اودے صدر گچین کننگ آ قازق الس و پارلیمان ءِ مبارکباد پیش کیوہ۔ پوسکن گچین مروک آ صدر قازقستان ناراہشونی ٹی قازقستان شونداری و شونہالی نا پوسکن آ بڑزی تیا سرمریک و پاک ۔ قازقستان سنگتی پین سوگو مریک۔ چیئرمین سینیٹ پارے کہ پاکستان نا نوکاپ آن زہمی مخلوق کن فراخدلانہ امداد کن قازقستان نا حکومت نا منت واری ءِ ہرفیوہ۔ ’’وژن سینٹرل ایشیا‘‘ پالیسی نا کمک اٹ نیامی ایشیائی ملک آتون پائیدار و بھرمی رابطہ قائم کننگ نا خواہندار ءِ۔ اوپارے کہ کراچی و گوادر بندرگاہ تا کمک اٹ نیامی ایشیائی ریاست آتے رسینگ نا فراوانی دا وژن نا اسہ اہم ءُ عنصر اسے۔ قازقستان نا پارلیمنٹ نا ڈل ءِ بخیر کرسا خوشی محسوس کننگ اٹی اُٹ۔ اوپارے کہ اومیت ءِ کہ دا دورہ برادر ملک آتا نیام اٹ مفاہمت و کمکاری ءِ سوگو کیک۔ پارلیمان السی سلاہ نا درشانی ءِ و پارلیمنٹ نا باسک آتا نیام اٹ تین پہ تینی ہن وبر مخلوق ءِ خڑک اتنگ نا جوان ءُ ذریعہ اسے۔ ادارہ پارلیمانی خذمت، پارلیمنٹرینز کن پٹ وپول و کاریم نا کچ ءِ ودفنگ نا تینا وڑنا یکتا ادارہ ءِ۔ انسٹیٹیوٹ پارلیمانی آزموندہ و علم ءِ بشخنگ کن اسہ گچین ءُ فورم اس فراوان کننگ کیک۔ ہڑتوم آ ملک آتا لائخی ءِ ہرسا ، ہڑتوم آ کنڈآتا واپار ءِ مون آ دننگ کن پوسکن ءُ کسر پٹنگ نا سخت گرج ءِ۔ ننے تینا واپار اٹ گیشتری اتنگ نا گرج ءِ۔ توانائی، کشت وکشار، آئی ٹی، ٹیکسٹائل ، توانائی و لاجسٹکس و ہاؤسنگ و تعمیرات نا بشخ آتیٹی اسیجائی ڈٹ آتا بناءِ کننگ مریک۔ زرکاری کن پاکستان اٹی بھلو وارخواہی اس ساڑی ءِ۔ قازقستان نا زرکارآک پاکستان آ بریر، زرکاری کیر، و ڈٹ آتیٹی شریداری کیر، نن اوفتے بخیر اٹ پانہ۔ چیئرمین سینیٹ پارے کہ کاروباری ، پوریاگر تپہ غاتے خڑک اتنگ نا گرج ءِ۔ ہڑتوم آ ملک آتا دفاعی کہول آ گچین رابطہ ءِ۔ تعلیمی و الس نا نیام اٹ رابطہ غاتے ودفنگ کن آجو ویزاپالیسی ویز پاکستانی وخت انا اہم ءُ گرج اسے۔ سیل و سوات، دودوربیدگ و گوازی تا بشخ آتیٹی ہڑتوم آ کنڈآتا کمکاری نا گیشتر گمان ساڑی ءِ۔ قازق طالب علم آتے پاکستان نا پنی آ تعلیمی ادارہ غاتیٹی تعلیم دوئی کننگ نا سلہ خلیوہ۔ ہڑتوم آ ملک آتا نیام اٹ پوسکن آ ٹیکنالوجی نا کاریم اٹ اتنگ کن تعلیمی کمکاری ءِ سوگو کننگ نا بھلو گنجائشت اس ارے۔ چیئرمین سینیٹ ڈل ءِ بڑزکو ایوان نا گرج ومسخت، کمیٹی تا نظام و کانود سازی ٹی کڑد انا بارواٹی ہم پارے۔ داوخت آ قازقستان نا ڈل انا راہشون شانوف یرلان زاکانووچ پارے کہ پاکستان ڈیہہ نا اہم ءُ ملک اسے۔ ہڑتوم آ کنڈآتا کمکاری آن رابطہ غاتیٹی پین پوسکنی بریک۔ پاکستان نا دورہ ءِ کرسا خوشی مس، مہمانداری بے مٹ ءِ۔
