ملک ءِ گچین کاری نا آخا سوگوی نا گرج ءِ، خواجہ سعد رفیق

لاہور۔ 13 دسمبر (اے پی پی) بنجائی وزیر ریلوائی خواجہ سعد رفیق پارینے کہ اینو ملک ءِ الیکشن ناآخا سوگوی نا گرج ءِ۔ سے شنبےنادے آ احتساب عدالت اٹی پیشی نا وخت آ میڈیا تون گپ وتران کرسا اوپارے کہ چیئرمین پی ٹی آئی عمران خان نا کمکار آک اسٹ اسٹ کرسا ہنار، داسہ نئے جہاز ءِ نئے جہاز ءِ چلیفوک ءُ ، اینو عمران خان تنیا رہینگانے و اونا لانگ مارچ نا حقیقت ءِ مچ آ قوم خنانے۔ بنجائی وزیر پارے کہ عمران خان تون ہچ کس اف۔ اسمبلی جوڑ کننگ و پرغنگ گوازی اس اف، گچین کاری کرفنگ کن پیسہ درکار مریک، ہنداخاطران ہراڑے نا حکومت آک ءُ ہموڑے کاریم کہ۔ اوپارے کہ ننا 2013 و 2018 نا کارکڑد نا عمران خان حکومت نا 4 سال اتون موازنہ ءِ کپس، ادارہ غاتے بھس کننگا، دا 8 تُو اٹی تو نن خاخر ءِ کسفنگ نا کوشست کننگ اُن، اللہ نا شکر ءِ کہ ملک ڈیفالٹ مننگ آ بچا۔ بنجائی وزیر پارے کہ نیب ءِ چٹفسا احتساب نا پوسکن ءُ ادارہ اس جوڑ کننگے۔ تینا برخلاف زیر سماعت کیس اناذکر ءِ کرسا خواجہ سعد رفیق پارے کہ ننے آ سیاسی مخالفت نا سوب آن مقدمہ جوڑ کننگا، ہرافک عمران خان ءِ ڈغار آن آسمان آ تولفیر، داسہ اودے خراب پارہ۔ اوپارے کہ پنجاب ءِ مہالو عثمان بزدار لٹاکہ داسہ ساڑی آ حکمران پُلنگ ءِ۔