وزیر داخلہ چوہدری نثارعلی خان نا چندی ہند آتیا السی مچی آن تران

اسلام آباد۔ 13مئی (اے پی پی) وزیر داخلہ چوہدری نثارعلی خان پارینے کہ گڑاس خلقت ملک اٹی ہیجان انگیزی و افراتفری نا سیاست نا ٹھیکہ ئِ ہرفینو۔ داوڑنا سیاست و بلاجواز محاذ آرائی جمہوریت کن زہر قاتل اسے۔ دا وڑنا عمل ملک انا شونداری ٹی بھلو اڑاند اسے۔ افراتفری و انتشار نئے جمہوریت نا فائدہ ٹی ئِ و نئے ہی ملک انا فائدہ ٹی ئِ۔ فیصلہ منتخب پارلیمان ، بڑزکو عدالت و الس نا عدالت اٹی مریک گلی و کوچہ غاتیٹی آخا۔ دا خیال آتا درشانی ئِ او حلقہ این اے 52و 53نا چندی ہند آتا دورہ نا وخت آ السی جلسہ غاتیان تران کرسا کرے۔ وزیر داخلہ پارے کہ جمہوریت و شونداری آن قومک مون آ کارہ و انتشار ، ہیجان انگیزی و افراتفری آن کیہی سال پدی کارہ۔ اسہ ہم سنجیدہ پاکستانی اس منفی و دوبہ خلنگ نا سیاست نا مخ تفی ئِ کننگ کپک اوپارے کہ پاکستان ئِ سوگو کروئی ئِ تو بردباری ، تحمل و مزاجی و سنجیدگی نا سیاست نا رواج ئِ کروئی تمک و گالم گلوچ نا سیاست ئِ مسترد کروئی مریک۔ اوسخت باسنی ٹی حلقہ 52 و 53نا چندی ہند آتا دورہ ئِ کرے۔ ہرافتے ٹی روات، کھینگرخورد، خصالہ، چونترہ ، چکری و سروبہ نا علاقہ غاک اوار ئُ۔