اسلام آباد۔ 12 دسمبر (اے پی پی) بنجائی وزیر سمندر پار پاکستانی و انسانی وسیلہ نا شونداری ساجد حسین طوری پارے کہ لیبر کمپلیکس ٹیکسلا ٹی 504 فلیٹ تینا کارندہ غاتا دوٹی تننگ والا ء،، دا پروجیکٹ ءِ بنائی وڑاٹ ڈبلیو ڈبلیو ایف نا گورننگ باڈی 2004 اٹی منظور کریسس، دا پروجیکٹ 240 کنال ڈغار آ تالان ءِ۔ داخیال آتا درشانی ءِ او دوشنبےنادے آورکر کمپلیکس ٹیکسلا نا بنائی دود آن تران کرسا کرے۔ داوخت آ سردار سلیم حیدر خان وزیر مملکت سمندر پار پاکستانیز ہم تران کرے۔ بنجائی وزیر پارے کہ اینو کنے خوشی ءِ کہ نن لیبر کمپلیکس ٹیکسلا ٹی 504 فلیٹ تینا کارندہ غاتا دوٹی تننگ والا اُن ہرا ورکرویلفیئر فنڈ اسلام آباد اٹی رجسٹرڈ ءُ۔ دا مزل کن ای تینا ورکرویلفیئر فنڈ اسلام آباد نا آفیشل ٹیم ءِ مبارکبادی ایتیوہ ہرا دا تغ ءِ سچ کننگ کن سخت خواری کرے انتس کہ کانودی و ایلو ویل آتا سوب آن بھلو وخت اسے آن سلوک ئسک۔ داپروجیکٹ ءِ بنائی وڑاٹ ڈبلیو ڈبلیو ایف نا گورننگ باڈی 2004 اٹی منظور کریسس۔ اوپارے کہ دا ڈٹ 240 کنال ڈغار آ تالان ء، ہرادے اسٹیٹ انجینئرنگ کارپوریشن آن کل 305 ملین نا خڑچ آن ہلنگانے۔ دا ڈٹ انا کل خڑچ 1314 ملین ءِ ہراٹی دا مسخت کن دوئی کروک آ ڈغار نا فہرست ہم اوار ءِ۔ دافتیان ہر فلیٹ نا احاطہ 762 مربع فٹ ءِ ہراٹی 2 بیڈروم، 1 لاؤنچ، 1 کچک و اسہ واش روم اس اوار ءِ۔ دا فلیٹ آتیٹی ہر اسہ ماڑی گراؤنڈ و 3 مزل آتیا تالان ءِ۔ ساجدحسین طوری پارے کہ نم غٹ دا حقیقت آن جوانی اٹ بلد اورے کہ ننا مزور تپہ ءِ بنداوی آسراتی فراوان کننگ پاکستان پیپلزپارٹی نا بنداوی منشور ءِ۔ ملک انا ورکر پیپلزپارٹی نا غٹ آن بھلا طاقت ءُ و ہراتم کہ نن اقتدار اٹی بسونن نن شہید ذوالفقار علی بھٹو و شہید بی بی نا نظریہ غا عمل کرین و آخبت ہم بلاول بھٹو زرداری نا کماشی ٹی کرسا کینہ۔ اوپارے کہ دا داوڑنا اسکیم تے ملک انا غٹ صوبہ غاتیٹی دُوارہ کننگ کن سنبرینگوک اُن ہرا مزور تپہ غاتا ہنکین نا گرج آتے پورو کننگ اٹ کمکار مریک۔ اوپارے کہ بنجائی وزیر نا حیثیت اٹ سوغند ہرفنگ آن پد ای فیصلہ کریٹ کہ داوڑنا غٹ ڈٹ آتے ورکرآتا دوٹی ایتیو ہراکہ کوزہ کن تیار ءُ۔ داکان بیدس ای تینا انتظامی کنٹرول و غٹ محکمہ غاتے پیدوار پارت جاری کرینٹ ہراکہ او داوڑنا ڈٹ آتا دمدستی بناءِ کیر ہرا گیشتر السی و قومی فائدہ غاتیٹی مریر۔ داپروجیکٹ 240 کنال ڈغار آ تالان ءِ و داسہ ہم داپروجیکٹ اٹی ڈغار نا اسہ زیات ٹکر اس دستیاب ءِ۔ دامسخت کن ڈبلیو ڈبلیو ایف نا ٹیم ءِ پارت کرین کہ او ارٹ میکو ریسہ ٹی داپروجیکٹ اٹ ایلو آسراتی دُن کہ اسکول، ڈسپنسری، کمیونٹی سینٹر، مارکیٹ، مسیت و گوازی نا پڑ وپین پین کے ہراڑکن المی کوشست کننگ انگ ءِ۔ دادے زوت آن زوت پورو کننگے۔ ایسر اٹ اسہ وار ولدا غٹ شرفمند آ مہمان تا منت واری ءِ ہرفیوہ ہرافک ورکرکمپلیکس ٹیکسلا نا بنائی دود اٹی بشخ ہلکر۔
