اسلام آباد۔ 12 دسمبر (اے پی پی) بنجائی وزیر آئی ٹی و ٹیلی کمیونیکیشن سید امین الحق پارینے کہ حکومت شاری و خلقی علاقہ غاتا نیام اٹ ڈیجیٹل تقسیم نا چٹفنگ کن سنبرینگوک ءِ، وزارت آئی ٹی گچین ڈیجیٹل آخبت کن ہرممکن گام گیج کننگ اٹی ءِ، مر مر انگا علاقہ غاتیٹی ٹیلی کام سروسز نا فراوانی کن چندی پروجیکٹ آتیا کاریم برجاءِ۔ بنجائی وزیر آئی ٹی سید امین الحق ، پاکستان۔ آئی ٹی یو ڈیجیٹل انکلیوژن ویک، نا بنائی دود آن تران کریکہ ہرانا انعقاد وزارت آئی ٹی و انٹرنیشنل ٹیلی کمیونیکیشن یونین (آئی ٹی یو) نا کمک اٹ داڑے دوشنبےنادے آ مس۔ دا وخت آ بنجائی وزیر آئی ٹی سید امین الحق پارے حکومت پاکستان انٹرنیشنل ٹیلی کمیونیکیشن یونین نا پاکستان کن زالبول آتے واکدار کننگ، چناتا آن لائن پروٹیکشن و آئی سی ٹی اسکان رسینگ نا بابت سپورٹ آ منت وار اُن، زالبول آتے واکدار کننگ حکومت پاکستان نا اولیت ءِ، ورناو چناتے ڈیجیٹل مہارت ہیل تننگ کن پبی گام گیج کننگ انگ ءِ۔ اوپارے کہ مصنوعی ذہانت ، بگ ڈیٹا، کلاؤڈ کمپیوٹنگ، موبائل روبوٹکس وخت انا اہم ءُ گرج اس جوڑ مسنے، آئی سی ٹی ہیلکاری پروگرام نا کمک اٹ زالبول آتے واکدار کننگ کن کوشست کننگ ءِ، وزارت آئی ٹی نا ’آئی سی ٹی فارگرلز پروجیکٹ ، زالبول آتے واکدار کننگ اٹ اہم ءُ گام اسے ، ملک اٹی ڈیجیٹلائزیشن کن گچین گام گیج کننگ اُن، شاری و خلقی علاقہ غاتا نیام اٹ ڈیجیٹل تقسیم نا چٹفنگ کن سنبرینگوک اُن، پسماندہ و مرمرانگا علاقہ غاتیٹی کینکٹوٹی نا چندی ڈٹ آتیا کاریم برجاءِ، وزارت آئی ٹی نا رداٹ معذور بندغ آتا آئی ٹی اسکان رسینگ ءِ آسان کننگ کن نیشنل آئی سی ٹی کونسل نا جوڑ کننگ معذور بندغ بھلو است بڈی گام اسے، معذور بندغ آتے ہم شونداری نا اسہ وڑ وارخواہی بایدے فراوان مرے۔ آئی ٹی نا کاریم اٹ اتنگ آن معذور بندغ آتا زند اٹی گچینی اتنگ مریک، آئی ٹی یو ممبر ملک آتا نیام اٹ ڈیجیٹل گدریفنگ نا بابت کمکاری اہم ءِ، وزارت آئی ٹی گچین ڈیجیٹل آخبت کن ہرممکن گام گیج کننگ اٹی ءِ۔ دود اٹی ایڈیشنل سیکرٹری (انچارج) محسن مشتاق، چیئرمین پی ٹی اے میجر جنرل ریٹائرڈ عامر عظیم باجوہ، چیئرمین پاشا زوہیب خان، سفراء، وزارت آئی ٹی نا ذیلی ادارہ غاتا سروک و ٹیل و ٹیلی کام کمپنی تا نمائندہ غاک بشخ ہلکر۔
