اسلام آباد۔ 12 دسمبر (اے پی پی) آزاد جموں وکشمیر نا وزیراعظم سردار تنویر الیاس خان پارینے کہ امت مسلمہ یک جان مرسا کشمیری تیکن توار بڑز کے۔ اسلامی رابطہ کمکار تنظیم (او آئی سی) ہر ریسہ غا کشمیری الس نا کمک ءِ کرینے و اوفتا حق خودارادیت نا مخ تفی ءِ کرینے ہراڑا اونا منت وار اُن۔ او آئی سی نا سیکرٹری جنرل حسین ابراہیم طحہٰ ہرا پیدوار و دوٹوک لوز آتیٹی کشمیری تا مخ تفی نا درشانی ءِ کرینے اوڑان تحریک آجوئی ٹی برسرپیکار کشمیری تا حوصلہ بلند مسنے۔ بھارت مقبوضہ کشمیر اٹی انسانی حق ءِ لتاڑانے ہلانے، بھارتی فوج ظالمانہ کانود نا کمک اٹ کشمیری تا زند ءِ ژند کرینے۔ کشمیر نا ویل انا پرامن و کشمیری تا است خواہی نا رداٹ ایسری آن بیدس ڈیہہ ٹی امن اسہ تغ اس ہی سلک۔ اسلامی ملک آک مقبوضہ کشمیر اٹی بھلو کچ اسے آ ظلم ءِ تورفنگ و کشمیری الس ءِ حق خودارادیت ترفنگ اٹ تینا اہم کڑد ءِ ادا کیر۔ اوداخیال آتا درشانی ءِ او آئی سی نا سیکرٹری جنرل حسین طحہٰ ابراہیم تون گپ وتران کرسا کرے ہرا جموں کشمیر ہاؤس اسلام آباد اٹی ڈل اتون اوار اوڑتون اوڑدہی کرے۔ داوخت آ وزیراعلیٰ گلگت بلتستان ڈاکٹر خالد خورشید، وزیرخزانہ وانلینڈریونیو عبدالماجد خان، ایمبیسڈریوسف الزوبی، سعودی عرب، ایمبیسڈر عسکر موزینوف، ایمبسڈر احمد سریر، مالدیپ ، اوآئی سی ٹی پاکستان نا آخبتی مندوب ایمبیسڈر رضوان سعید شیخ، منصور دیئوپ، سینیگال ، وقاص لطیف، محمد عاطف، علیو حماحمانی، پرنسپل سیکرٹری احسان خالد کیانی، سیکرٹری کشمیر کاز، آرٹس اینڈ لینگویجز خواجہ اعجاز حسین لون، پی ایس او کاشف نیاز، کمکار ناظم خواجہ عمران الحق ئسک ہم ساڑی ئسر، وزیراعظم تحریک آجوئی کشمیر نا شہید آتے خراج عقیدت پیش کرسا او آئی سی نا سیکرٹری جنرل ءِ پارے کہ داوخت آ لکھ آکشمیریک بھارت آن آجوئی کن تینا جون تے ندر کرینو۔ اوپارے کہ کودک کشمیری 8 لکھ بھارتی فوج انا مون آ سینہ سپر ءُ ، ہرااوفتیا ظلم انا زی آ ظلم کننگ اٹی ءِ، اسلامی ملک آک کشمیری تا توار جوڑ مریر و اوفتے حق خودارادیت ترفنگ کن تینا اثرورسوخ ءِ کاریم اٹ اتیر۔
